Kiwa hayung hasem ka (L) Ebamon Siangshai da e khublei ki ya ki lok ki jor kiwa da smat wow yarap hadien wa jia i chah tynyap ko ha ki damok ki wym tipmit.
Kam wow pynkynmoo, ka Ebamon Siangshai da wiar ko nadooh i step ka 12 tarik hadien wa lai ko cha Wapung Higher Secondary School Wapung wei hadooh i janmiet kani ka sngi heipor kamwa 6 waje hadien wa ym em de u poi yung ko da sdang kulmar ki.
Waroh chi miet ka 12 tarik da yaleh ki u thooh ya ka deiwa kylli na ki lok wa ki para wa lai skur ko hadooh i miet ka 13 tarik ym em poi pyrkhat ki wa kani ka khynnah da chah tynyap ko wei da noh ya i metyap yong ka ha iwi i khloo ha 2 Kilo ha ka chnong Dkhiah East, East Jaiñtia Hills District.
Ha kam ini i por wa ka yung ka sem dang em ko hei doom i langoh, da wan yarap ki lok ki jor na jan na jngai wow synraan ya ka yung nadooh i por wa chem ya i metyap ko hadooh wa pyndep ya ka niam wa khaddooh ynne ka 15 tarik chirup i em ki para wa lai skur ko.
Kamtæ neiliang ka yung ka sem e ko i sñiawngooh ya ki lok ki jor, kynthup ya u Waheh Chnong, President wa Secretary VDP ka chnong Dkhiah East, Jaiñtia Students Movement (JSM), u Vice President wa ki dkhot ka seiñ, u OC ka Khliehriat Police Station wa ka O. Tyngkan In-charge ka Women Police wa kiwi ki pulit, kiwa kitkaam chnong ka Pamrakmai, ki para kur Siangshai wa ka Seiñkur Phawa Siangshai Pamra Unit wa kiwi ki lok najan najngai.
Ka yung da ong ko wa ym ye de wow su kylliang yeiwa da lehbha ki wei da kitbok kitrwiang wow man kiwa dap wa biang ha waroh ki liang deiwa kyrmen wa u Blai u kyrkhu u ya ki ha ki kaam yong ki.
Kani ka e khublei toh na u Hilarious Siangshai wa kiwa hayung hasem ka Ebamon Siangshai.
