Jowai : Ka yakop kynjat bol 2nd Division yong ka West Jaintia Hills District Sports Association ha kani ka tayaw da ye ko u pyndep ya ki yakhun quarterfinal heiwa ki team wa yoh u psiah semifinal toh ka Moosalyngkat Sports Club SC, ka Phramer SC, Khliehiongriang SC wa ka 7 Wasa SC.
Ha ka yahun quarterfinal wa nyngkong ha ka 12 tarik uni u bnai ha pyrdi ka Moosalyngkat SC pyrchah ya ka Lion SC ka Moosalyngkat da jop ko da 3 kool la nod ya ka Lion SC. Katwa ha ka quarterfinal wa bood won ha i janmiet ka yakop da man ko ha pyrdi ka 7 Wasa SC pyrchah ya ka Mustem West SC heiwa ya kani ka yakop da jop da ka 7 Wasa SC da le kool la nod.
Ha ka sngi wa bood ka 13 tarik heipor chitein sngi ki team wa mih madan u yaknieh psiah cha ka semifinal toh ka Caroline Colony SC pyrchah ya ka Phramer SC heiwa ya kani ka yakop da jop da ka Phramer SC da 5-0, katwa hei janmiet wan ki team wa mih madan toh ka Khliehiongriang SC pyrchah ya ka Loom Chyrmang SC heiwa ha kani ka yakop ha kani ka janmiet da jop da ka Khliehiongriang SC da ka 6-1.
Katkam ka wyrta wa yoh na ki bor pynlai ka West Jaintia District Sports Association da ong wa ya ka semifinal yong kani ka 2nd Division Football Tournament u pynman ha ka sngi Pynsiñ 21 tarik u Khonchonglad heiwa ka Moosalyngkat SC u mih madan ko pyrchah ya Phramer SC ha i por pyrdi sngi 12 waje katwa hei janmiet wan hei por 2:15 ka 7 Wasa SC u mih madan ko pyrchah ya ka Khliehiongriang SC.
Discussion about this post