Ka lehñiam Behdieñkhlam ka Seiñ Raij Mukhla ha uni u snem 2024, ynne dapoi ko cha ka sngi wa ar ka sngi Mulong heiwa ki khon khynroo chirup wa ki waheh da mih ki dang step na yung yow lai cha khloo yow li deiñ ya ki ar tylli ki Dieñkhlam Dieñ Blai yow yoh u pynpoi cha madan Ryngkaw heiwa ya u Dieñkhlam da deiñ chyrngan da u khian yow pynyieñ ha madan Tih Khyndaw ha Wahchnong uwa man u Dieñkhlam Tre Blai Tre Ñiam, katwa sa uwi won u Dieñkhlam uwa man u Dieñkhlam Blai hi uwa ye u daiñ da uwon uwon u jait leh hoi hi, wei ya uni u Dieñkhlam hadien wa da wanrah ya oo na khloo da booh chwa chimiet ha madan Ryngkaw ha Madan Slotmasi heiwa ya uni daw pynyieñ ya oo mynstep heipor 2:00 waje i sngi chirup wa u Dieñkhlam Blai wa wanrah da ka chnong Mukhla Umlangshor.
Kamtæ hadien kani ka wan li thooh Dieñkhlam na khloo, neiliang u Pa Langdoh uwa man u khliehdooh hapoh ka ñiam ka rukom uwa ksoh ya Ka Plang Ka Nar, U Tylli U Kyntien, Ka Wait Ka Stieh, da pynman u ya ka Dorbar Ñiam chirup wa ki Waheh Sankur kiwa man kiwa bood yong oo hapoh ka ñiam ka rukom wei ya kani ka Dorbar Ñiam da pynlai da u Pa Langdoh chirup wa ki Waheh Sankur da i klam da i pyrkhat kaam ya kiwa toh u leh næ u pyndep neibynta ka mynstep ka sngi Musiang kawa man leh ka sngi wa le yong ka lehñiam Behdieñkhlam ka Seiñ Raij Mukhla.
Ha kani ka Dorbar Ñiam da ya pynbait leh neibynta ki bru ki wow rooh ya ki thlu yow pynyieñ ya ki Dieñkhlam Blai kamjooh ki wow chna ya ka Chanaroh yow pynyieñ ya ki Dieñkhlam Blai mynstep ka sngi pyn le tylli, wei hadien dadep jied ya kitæ ki wow yarap mynstep, u Pa Langdoh won da e u yei sneiñ i kroo ya waroh ki khon ka Seiñ Raij neibynta ka Chaad Sngi mynstep ka sngi Musiang yow man ki khon ka Seiñ Raij kiwa emakor emburom ha katai ka sngi.
Ha kani la lehñiam Behdeiñkhlam da wan leh wow chimbynta da u Wailadmiki Shylla uwa man leh heijooh i por u MLA ka Jowai wei man u leh kam u khon yong ka Seiñ Raij Mukhla, uwa da e leh ki kyntien sneiñ kyntien kroo ya waroh ki khon khynroo khyllood ka Seiñ Raij Mukhla.
Kamtae hadien wa da wai kani ka Dorbar Ñiam, u Pa Langdoh chirup wa ki Waheh Sankur kamjooh wa ki Sai Khrong Sai Kyncha da pyndep ki sa ya ka ngooh ka dem Blai hakhmat ka Khloo Blai Khloo Kyntang yow kyrpaad ya u Blai Kynrad yow noh chooh chooh u yei kyrkhu kyrdoh ya waroh ki khon ka Seiñ Raij Mukhla.
Discussion about this post