Ynne ka sngi da pynman ya i pyndur wa khih khmi wa khlanbor 7.8 kam chibynta ka Mock Drill ha Khliehriat wa pynman da ka District Disaster Management Authority, East Jaiñtia Hills District, Khliehriat chirup wa ka National Disaster Response Force (NDRF) hajrong wow pynkhreh ya ki paidbah wa kiwa krehkaam ki chnat sorkar ka District heiwa kammon u leh lada khih khmi.
Ya ini i pyndur da pynman ha madan ka Khliehriat Higher Secondary School, Khliehriat heiwa da sdang deiwa pynkieh ya ka Siren heiwa da pyndur wa khih u khmi ha Jaiñtia East College, ha Ambrose Memorial Secondary School, ha yaw Khliehriat wa ha Khliehriat West Community Hall.
Neiliang ki pulit ka NDRF, ki Civil Defence & Home Guards da pynyoo ki kammon wow thooh wei wow pynlait ya kiwa sahkut hapoh ki skur wa ki College wa oor wei kammom wow pynkit ya ki cha ki thaw sumaar.
Ya kani ka Mock Drill da pynman katkam ka Incident Response System (IRS) wa kynthup ya ki Responsible Officer (RO), Incident Commander, Operation Section, Planning Section wa ka Logistic Section heiwa da chimbynta da kiwa sikai, ki khynnah, ki bor chnong, MPRO, Police, Health, Fire & Emergency Services heiwa da ekti ya ki ka bhah wa ki kaamram yong ki.
Ha kani ka sngi u NDRF Inspector R.L. Danla wa u Sub-Inspector of Civil Defense and Home Guards, u Y. Challam da batai ki ya i kaamram wa i myntoi na kam kani ka Drill.
Neiliang u Deputy Commissioner cum Chairman District Disaster Management Authority, East Jaiñtia Hills District, Khliehriat, u A. Baranwal, da ong u wa emkaam wow man ki bru wa da pynkhreh lada khih khmi wow yada ya kiwa hayung hasem.
