Jowai: Ka pynhaap pyrda ya ka lehkmen dap 5 snem wa da pynkrehkaam ya ka Rashtriya Kishor Swasthya Karyakram (RKSK) ha West Jaintia Hills da pynkut ya ka ynne ka sngi da ka yakob miat khynthai bha chynrang ha District Library Auditorium, Mynthong Jowai kawa tip kam ka Miss & Mr. Chrysalis.
Ya ki ktien pdiang burom da yoh naka Dr. VJ Laloo, District Nodal Officer of RKSK heiwa ha kani ka sngi u Waheh Chnong ka Lion Mission Dorbar Chnong u M. Rymbui, da man u kam u kongsan.
Ya kani ka yakob Miss and Mr. Chrysalis da pynman da ka yung krehkaam u District of Medical and Health Officer, West Jaintia Hills yow pynchlur wei wow e mynsien ya ki khynroo khyllood kawa man kawi na ki thong ka RKSK kawa da pynkrehkaam kyrpang ya kiwa dang khai khynroo.
Ha kani ka yakob ka Rimaya Passah da yoh ko yei naam Miss Chrysalis, wa ar da yoh ka Payadani Lhuid wa le won da yoh ka Sima Lamin.
Neiliang ki chynrang yei naam Mr. Chrysalis da jop u C. Vivian Rymbai, wa ar da yoh u Jeremy Talang wa le won da yoh u Samuel Shylla.
Kiwa chimbynta da yoh ki wow pynyoo yei sap yong ki ha ki le kylla heiwa nyngkong da pynyoo yei riam tynre, wa ar i riam Casual wa i jubab yeiwa kylli kiwa bichaar.
Ha chwa wow ini neiliang u kongsan da snein u ya ki khynroo khyllood wow kynmoo u man kiwa ye u yait nei chah eiñ ha kiwa boon ki kaam wa sih.
Ka Daina Tongper kawa mihkhmat ya ka District Mental Programme, Civil Hospital, Jowai da klam ko chaphang i emkaam u man kiwa chngaiñ hei pyrkhat pyrdain wei ym toh u dooh kyrmen hei im wei lada chem ki ya ki bru wa chitom hei pyrkhat pyrdain toh u yarap ki ya ki wow yachem wa ki Counsellor wa ki Doctor.
Ha kani ka sngi da yoh leh yei klam na u RKSK Brand Ambassador u Hameshaniah Suiam.
Discussion about this post