Jowai: Ka lympung 16th Invitation Gold Cup Football Tournament wa da pynman da ka Moosyiem Cultural & Sport Club Shangpung (MCSC) ha madan Hula Playground Moosyiem ha kani ka 27 tarik da poi ko chawa kut heiwa ka Austen FC na Ialong da rah ko yei naam jop wei da yoh ko ya ka song poisa kawa T. 1 lak wa i ksiar chiteiñ tula katwa ka CYC Mowkaiaw da rem ko deiwa yoh ya ka poisa kawa T. 50,000 wa i ksiar chiteiñ tula.
Ha kani ka sngi da pynchongchit dei emlang u K.M Lytan uwa man u MDC ka thaaiñ u wa man kam u kongsan wa u symbood kongsan u D. Langstang, Executive Engineer, PWD North Division, Jowai.
Ka yalehke ha kani ka sngi da man ko kawa chongchit hadooh kattæ kattæ heiwa ki ar liang da yoh ki u pynkhih ya ka jaar da mar ar kool, wei da rai ya kiwa jop lyngba ka chut tiebreaker kawa 5 kool la 3 kool yeiwa da wan sakhi kamwa 4000 ngut ki ki paidbah.
U kongsan wa u symbood kongsan da yaroh ki ya ka Mowsyiem Cultural Sport Club wa da ye ko u pynman ya kani ka lympung Football kamwa la 16 tylli ki snem wa da lai, da ong ki leh kam kani ka lympung da pynlait ko ya ki khynnah khynroo na ki kaam sih, nalor wa yoh ki yei chait i khiah.
Da pynchlur ki ya ka MCSC wow dang ye ko u pynman ya kam kani ka lympung ha ki snem wow wan deiwa kyntu ya kiwa chong chnong ka Shangpung waroh kawi wow yakreh lang ki wei da kular ki leh wow e kyrchaan ya ka MCSC katwa ye i bor yong ki.
Neiliang ka MCSC da e khublei ko ya waroh kiwa da noh synniang cha ka Club, da e khublei ko leh ya ka Jaiñtia Referee Board, Jowai wa da yarap ko wow pynlai bait ya kani ka lympung.
U President ka Club, u A. Sutnga da e khublei u leh ya ka Shangpung PHC wa da phah ko ya ka Medical Team wa ya ki 32 tylli ki dhab kiwa wan chimbynta.
Yei naam Best Player wa ka Best Goalkeeper da rah da kiwa yalehke ka Austen FC Ialong.
Discussion about this post