Ka yalang pynhaap pyrda yaka District Level Nasha Mukt Bharat Campaign ha West Jaiñtia Hills da pynman ynne ka sngi ha Yungwalieh ka Tpep Pale, Jowai heiwa u L. Kynjing, Additional Deputy Commissioner da man u kam u kongsan.
Da emlang leh u MJ Margnarm DSP, u MA Challam, Extra Assistant Commissioner, ka J Synnah, District Social Welfare Officer cum Member Secretary District Level Nasha Mukt Bharat Campaign, u Alan Niangti President Synjuk ki Waheh Chnong, Jowai, u Rev. L.O. Garod, Secretary, Industrial & Institutional Ministry KJP Synod Mihngi,u Rev. HH Mohrmen, Secretary SURE, ka Dr. JN Shullai, Project Director Mihmyntdu Community & Social Welfare Association, Jowai, u Anthony Syiemiong Director Manbha Foundation, Jowai deilang wa ki bru paidbah.
Hawa e yei klam, u L.Kynjing da e khublei u yaka Social Welfare Department, ki NGO wa kiwi kiwi ki yung krehkaam kiwa da ya chimbynta chongchit wow leh ya kiwa boon ki kaam hapoh ka District yow pyndooh yei pynemkaam drugs. U Kynjing da ong u wa ka thong ka Nasha Mukt Bharat Campaign toh yow wanrah yei pynsñiawthooh paidbah yei ktah i pynemkaam ya ki jait pynmuaid, kamjooh yow thooh laad kammon wow yarap ya kitu kiwa da chah kdoh chah khoom hei dih ya ki jait pynmuaid. Da khut u leh yei ya krehlang yong waroh yow pynkhooid yaka District nei dih drugs.
U Rev. H H Mohrmen hawa e yei klam wai phang da ong u iwa na ki daw wa pynman ya kani ka Nasha Mukt Bharat Campaign ha West Jaiñtia Hills District toh wa da tipmit yaka kam kawi na ki 272 tylli ki District kawa chah ktah hei dih ya ki jait pynmuaid. Da ong u leh wa heithaw wow kyntait ya kiwa pynemkaam drugs toh u man noh i kam kiwa wanrah yei kylla hapoh ka imlang sahlang.
Hawa e yei klam ya iwa da wanrah wa bha wa mih na kani ka Campaign, ka Dr.J N Shullai da ong ko wa emkaam wow booh ya ki De-Addiction Centre hapoh ka District iwa daw yarap ya kitu kiwa da kwah wow lait nei dih drugs.
Ya kani ka Campaign toh kawa da sdang da ka Ministry of Social Justice and Empowerment ka sorkar India da ka thong wow pyndooh yei chah kdoh chah khoom ha ki jait dih pynmuaid.
Ka yung krehkaam ka District Social Welfare Officer waka District Administration, West Jaiñtia Hills deiwa ya krehlang waka Manbha Foundation, Jowai, ka Society for Urban and Rural Empowerment, Jowai, Industrial & Institutional Ministry KJP Synod Mihngi, Jowai, Mihmyntdu Community & Social Welfare Association, Jowai waka Scope Foundation Mukhla da pynman ki ya kiwa boon ki pynsñiawthooh paidbah kiwa da pynman ha ki skur wa ki chnong yow yarap chem leh ya kitu kiwa pynemkaam drugs.
Ynne ka sngi da sdang yaka daka yaphet Cross Country Run wa pynman daka yung krehkaam u District Social Welfare Officer deiwa ya krehlang waka yung krehkaam u Sports Officer, West Jaiñtia Hills heiwa da wan wow kaweh lama yaka da u MA Challam, Extra Assistant Commissioner kawa da wan chimbynta palat 400 ngut ki chynrang wa kynthai.
Ka District Social Welfare Officer ka J. Synnah da pyntip ko wa yow pynbniah yei sñiawthooh ya ini i kaam, da pynman ya kiwa boon ki yakob heiwa ya kiwa jop da e da ki Certificate wa ka song poisa kamjooh ya kiwa jop yaka Cross Country Run.
