Jowai: Ka Dorbar Chnong Lumpariat ynne ka sngi da pynhiar pyrda ko yei lehkmen dap 25 snem nadooh wa seiñ ya ka heiwa ka lehkmen da sdang ko nadooh ka 07-02-2017.
Da wan sakhi ya kani ka sngi da u Dolloi ka Elaka Jowai u Puramon Kynjing kam u kongsan hei emlang u Rev. Pastor N.K. Syngkli JPC, u Rev. Fr. H. Lamare Jowai Parish wa u Principal ka North Liberty HS School u Richard Uriah.
Da yoh ya ki kytnien pdiang sñiawbha na u waheh chnong ka Lumpariat u J.K.R. Rymbai wei ya ka parom ka chnong na u Joseph Khonglah uwa man leh kam u Chairman ka LSJCC uwa da khana wa ka Lumpariat nachwa man ko kam chibynta ka Mookyrdup wei ha ka 07-02-1992 da man ko kam ka dong Lumpariat wei ha kitu ki por ympu em biang ka bordiñ, ka um waka luti wei ha u snem 1994 da yoh ya u sarok hapoh ka dong wei ya ki thaw baamdooh kutsnem leh da pynman katwa lait i thaw.
Kamtæ ka chnong da lai ko cha khmat wei katni da em ko leh ki skur wei da biang kiwa boon wa emkaam kiwa chong chnong wei da yoh leh u chna ya ka Community Hall deiwa yarap ki MLA, MP wa MDC.
U Rev. Pastor N.K. Syngkli hei klam yong oo da ong u wa ha ka imlang sahlang emkaam ka burom kylliang nadooh kiwa pyllai chnong para wa chong chnong yow lait ki kaam yaknieh thaw, knieh um wa kiwi kiwi de yow wanrah ya yatllyi hapoh ka chnong wa ka chongsuk chong saiñ.
U Rev. Fr. H. Lamare leh da ong u wa emkaam ka yatylli hapoh ka chnong ka thaw yow pynku yei pyrtuid wa bha ka chnong hadooh wa wa chisien wa tip ki bru wa toh kiwa sah hapoh kani ka chnong da em bait itæ i burom kat cha wa lai.
Neiliang u Dolloi ka Elaka Jowai da kynmoo u yei kreh lang wa ka Dorbar Chnong Ladthadlaboh yow pynman ya ka Lumpariat kam ka chnong wa pura ka wow mih noh naka Ladthadlaboh wei yeini da ye u leh ynnin u snem wei da yoh sanad leh u waheh chong ka Lumpariat.
Da kyntu u leh ya ki khynroo khyllood ka chnong wow kreh chitom ki yow pynkhreh yei dap 50 snem ka chnong.
Ha kani ka sngi da pynyoo leh ya i siawngooh ya kiwa chong chnong kiwa da kreh chitom wow pynman ya ka chnong kamwa man ko katni.
Da pynchongchit leh ya kani ka sngi pynhiar pyrda da ki rwai ki chaad na ki khynnah hadooh ki manbei ka chnong.
Discussion about this post