Ynne ka sngi da man ko kam ka sngi wow sahkynmoo ya ki paidbah ka chnong Nongtalang heiwa u MLA ka thaaiñ uwa man leh u Montri ka chnat puræ puthi ka sorkar jylla, u Lahkmen Rymbui da wan wai wei da booh mooyurim u ya ki kreh wa yatoh wa ki kaam puræ puthi hapoh ka chnong.
Kini kynthup ki yei wai ya ka yung skur wa thymme ka Nongtalang Government LP School wa ka Nongtalang Govt. Secondary School ya kiwa dang dep chna wot wei kamjooh leh da booh ya u mooyurim wow chna ya ka Administrative Building cum Auditorium yong ka Nongtalang Government Secondary School ka wow chna ha i lut wa T. 1.24 klur.
Ha kani ka sngi u Lahkmen Rymbui da man u kam u kongsan hei emlang u Addl. Chief Secretary ka jylla uwa pait leh ya ka chnat puræ puthi, u DP Wahlang, u Director ka chnat puræ puthi, u Ambrose Ch Marak wa kiwi kiwi.
Ya ka yalang ha kani ka sngi da pynlai da ka District School Education Officer, West Jaiñtia Hills ka A. Syiem.
U DP Wahlang hawa e yei klam da e khublei u ya kiwa sikai kamjooh ya ki paidbah ka chnong wa da ye wow wai ya ki yung wa thymme kini ki ar skur.
Da pyntip u wa ya ka yung skur ka Secondary School da chna ya ka hapoh chi snem donhi ha i lut wa T. 3.75 klur wei ya ki chuki ki miej daw e ha u snem wow wan ha i lut wa T. 30 lak wei ya kani da yoh yarap poisa na ka Ministry of Tribal Affairs. Katwa ya i yung thymme ka skur Lower Primary School da chna ha i lut wa T. 35 lak na ka chnat BAD ka jylla.
Chooh chooh da kyrmen u wa kat kini wa da wanrah hapoh ka chnong hapoh 3-4 snem daw ye u pynmih ya ki Top Ten ha ka Result SSLC.
Kam u kongsan ha kani ka sngi, u Lahkmen Rymbui da ong u wa i daw wa poi u ha kani ka kyrdan wa katni toh na kani ka skur, heiwa da ong u wa angnood u wa kani ka skur u yaryngkat ko wa kiwi ki skur wa em ha ka jylla.
Da ong u wa nadooh wa man u kam u MLA ha u 2008 ym jooh psiah u ha ka Nongtalang Secondary School neibhah wa kwah u wa manda psiah u ha kani ka skur daw ye u wanrah ya iwon iwon i kaam namo ki kreh ha kani ka skur.
Da ong u wa kam u Montri ym ye wow pait du ya ka Constituency tangwa emkaam wow kreh salonsar neibynta ki skur wa ki thaw puræ ha kylleiñ ka jylla.
Heijooh i por da ong u wa poi ki hadooh kani ka kyrdan toh nei kreh chitom tangwa katni emkaam wow yarap pyn da’i ya’i dæ deiwa raikut mynsien khnang wow poi cha ka thong i jop.
Da ong u leh wa boon ki kreh tangwa boon na ki kreh da chim da kiwa na baar, deiwa e nongmuna ya ki pooh chi-loom ha Nongtalang em palat 40 tylli heiwa kiwa yah ya ki yoh ki ya ka tulop wa T. 30,000 chi bnai tangwa heini du ki baar jylla wa yah ya ki, tæ neiyi i daw wa ki khynnah ymbien ki wow lai hikai wow yah ya kini ki kor neibhah wa du i kaam sorkar ymtoh iwa suk wow yoh.
Chooh chooh da kyntu u ya i krehlang yong waroh wow wanrah ya i kylla wa ya i bha.
Da pyntip u wa ynnin ka sngi ka sorkar India da pynlait ko T. 58 klur wow su ya ka tulop kiwa sikai wei da kyrmen u wa daw ye u su ya ka tulop kamwa ar bnai cha kiwa sikai.
Ha kani ka sngi da yoh leh i klam na u Waheh Chnong ka Nongtalang, u Dr. R. Pohsnem uwa jooh man leh u khynnah warim ka skur wa kiwi kiwi.
Ya kani ka sngi da pynphooh da ki rwai na ki khynnah yong kini ki ar tylli ki skur wei da pynkut ya ka yalang da ka SDSEO, ka S. Pyrtuh.
