Ki skur ki bru samen da rai ki wow pteiñ ya ka chuti tlang hadooh ka 15 tarik uni u bnai neidaw wa joor leh i kjam wei dait-thah na nongbah Delhi.
Ki skur ki bru samen ha Delhi da toh u wai ki ha ka 9 tarik uni u bnai hadien wa kut ka chuti tlang.
Ka chnat Puræ Puthi da dep ko leh wow sneiñ ya waroh ki skur ki bru samen wa em ha Delhi wow khang ki hadooh ka 15 tarik neidaw wa joor i kjam wei ynne da pynmih sa kawi ka hukum wow phah pyndam ya ki Remedial Classes kiwa da pynman kyrpang neibynta ki khynnah wa rap tlot neibynta ka Class-IX hadooh Class-XII.
Ya kini ki Remedial Classes kiwa da lai chakhmat kattæ da phah pyndam ki chisyndon tangwa ki Practical Exam deilang wa ki Project Assesment wa Internal Assesment neibynta ka Class-X wa Class-XII neibynta u 2022-23 u pteiñ ki kamwa da booh tarik da ka CBSE.
Ka nongbah Delhi da maad ko yei kjam wa joor bha ynne haddooh wa da hiar cha 1.9 Degrees Celsius i kjam, iwa kjam dooh hadien ar snem yong u jooh uni u bnai.
