Jowai : Kam wa jooh leh khlieh snem, ynnin ka 3 tarik da pynkhooid ya ka Iawmusiang ka chnong Jowai kawa pynman da ka Jowai Traders Association deilang wa ka Seiñraij Jowai.
Ha chwa u sdang u pynkhooid ya ki luti syngkieñ ki dukan dukdoh da pynman ya ka yalang wa tbian heiwa da emlang u SP ka WJH, u Dolloi wa chi por ka Elaka Jowai u P. Kynjin, u Moonlight Pariat, MDC kamjooh wa u President ka Seiñraij Jowai, u O.R. Challam.
Ya kani ka pynkhooid Iaw da pynman kam chibynta wow kynmoo warom ya ka sngikha u Mahatma Gandhi wei man ko leh kam chibynta ka Swaach Bharat Abhiyan.
Ha kani ka sngi da khang leh ya waroh ki kari wow psiah ki cha i bynta ka Iawmusiang yow lai bait i pynkhooid Iaw heiwa waroh ki tre dukan da pynkhooid ki ra jar jiar ki dukan kamjooh leh ya ki dooid ki nala wa em ha kani ka thaw.
Da man leh iwa rap yoo phær wa heipor wa pynkhooid ya ka Iaw wa man ko kawa thylli wa khlem kari kawa da pynmih i pyrkhat ha ki paidbah wa ye hi ma-ai wow pynkylla ya ini i bynta u sarok nadooh na Laadkynroohsaphlang hadooh ha Laad wa noh cha Pohskur kattu katni kynta chi sngi yow man u kam u sarok lai kjat.
Hadien wa dep pynkhooid won ya ka Iawmusiang da mih won sa i ood na ki paidbah wa sah i jhep wa slem ka Municipal u wan kit ya ki.
Discussion about this post