Ka Behdieñkhlam ka Raij Jowai toh ka wow sdang nadooh ka 11 tarik wei daw pynkut ha ka 14 tarik uni u bnai heiwa kam chibynta yong kani ka lehniam, ynne ka Khyllaw ka 10 tarik da pynkhooid ya ki yaaw hapoh i pait u Dolloi, u Langdoh, u Pator, ki Wasan wa kiwi.
Ki thaw ha yaaw wa da pynkhooid toh ka Madan Datlakawor, ka Pohsawiar (Stand War), ka Madan Chaad Sukra, ka Madan Kñia Khad, Madan Pynchongngiah Dieñkhlam, ka madan pynchong ya ka Symbood Khnong, ka Madan Siatthong wa kiwi.
Hawa yaklam wa u Dolloi ka Elaka uwa man u khlieh ka niam, u Puramon Kynjing da ong u wa i pynkhooid ya ka yaaw toh neidaw wa man ko ka thaw paidbah wei wow pynkhreh yei pyndep ya ka niam ka rukom deiwa man ka thawa kawa khooid wa jngiar.
Da ong u leh wa ini man i i pynkhroo ya kini ki thaw neibynta wow man miat man bha wei i khooid i jngiar iwa chibynta wow yoh yei chait i khiah ya ki bru dei bor ki Blai.
Nadooh ynne ka sngi kini ki thaw toh neibynta ki kaam lehniam katwa hadien ki Soo Sngi Le Yaaw won daw man ki leh ki thaw paidbah.
Discussion about this post