Jowai: Kam chibynta i pynkhreh yow wai noh yaka yaw Raliang kawa da khang nadooh wa sdang ka Lockdown hapoh ka jylla, kamtæ ynnin wa ynne ka sngi da pynkhooid pynpliah noh yaka.
Ya kani ka yaw da pynlai daka Raij lyngba ka u Dolloi, u Pator, u Langdoh waki Ñiaw Waheh Ñiaw Wakñi yong ki le chnong ki khon ka Raij Raliang wa kynthup ka chnong Laskeiñ, Raliang waka Nongkynrih.
Hei yaklam wa u Dolloi ka Elaka Raliang u C. Lyngdoh da ong u wa u snem 2020 toh u snem wym man, u snem wa dooh nong ki paidbah heiyatoh wa ki yaw ki haat wa ha kiwa boon rukom yong i long i man yong ki bru nadooh i puræ puthi ki khon ki kti wa kiwi kiwi.
Neitæ ini i pynkhooid toh hadien waka sorkar leh da e laad ko wow wai yaki yaw, wei mar ya dep pynkhooid daw em i yachong pyrkhat hapoh ka Committee neibynta u wai ya kani ka yaw kamwa wai cha kiwi won ki thaw.
Da khana haroh u wa man-u-snem jooh leh yeini i pynkhooid ya kani ka yaw da ki khon ka Raij Raliang na ki le chnong katwa ha uni u snem won neidaw wa em ka khlam wym ye de u khut da ki khon ka Raij heiwa da hap noh wow e nong.
U Dolloi da pyntip chooh chooh u wa kamwa kani ka yaw toh ka yaw niam, ini da toh lang i kamwa jooh leh khlieh u snem ha kam ini i por wa jooh em i lehniam chwa wow ah ya u khoo u kba.
