Shillong: Ka chnat Election yong ka jylla da man ko kawa da pynkhreh wow pynman ya ka Election chiteiñ samoi ha Shella Constituency ha kawon kawon ka por manda pynbna tarik ka Election Commission of India.
“Ha kini ki ar snem da pynlai i ya boon tylli ki Election, nadooh ka MLA Election 2018, ki Election chiteiñ samoi wei i dang dep i ya ka Election MP cha Lok Sabha ha uni u snem. Ki sahep wa ki wakreh ka chnat man ki kiwa khreh neibynta ka Election chiteiñ samoi ha Shella wei boon toh kiwa da chemphang wow pynlai yaka Election. Ki tiar leh da biang lut nadooh ki EVM wa VVPAT wei kawa sah katni toh wow yang yei phah ka Election Commission of India (ECI),” da ong u Chief Electoral Officer (CEO) ka jylla, u Frederick Roy Kharkongor hawa yaklam wa ki kattu katni ngut kiwa thoh khubor.
U Kharkongor da pyntip u leh wa ka chnat da pyntip ko cha ka ECI yei man thylli noh ka chuki MLA ha Shella Constituency hadien wa khlaad noh u Dr. Donkupar Roy, wei hadooh katni ka ECI ym pu em pynbna ko ya ka sngi wow pynman ya ka Election chitieñ samoi ha katai ka Constituency.
“Katkam ka kyndon aiñ, em por hadooh ynru bnai wow pynman yaka Election, kattæ hadooh ka 28 tarik u Duiatra (Jan) 2019. Ym ye u ong chwa wa daw man ko ha uni u snem næ hadooh wa sdang u snem thymme,” da ong u.
U CEO da ong u wa boonsien ka Election Commission ka jooh pynman ko yaka Election chiteiñ samoi ha i jooh i por wa ki Election wa kiwi ki jylla. “Ha uni u snem daw em ka Election ha Haryana wa Maharashtra, wei ye u man ka Election Commission daw pynbna lang ko yaka Shella wa kitai ki Election, tangwa ym tikna won wa u man ko ha uni u snem,” da ong chooh chooh u.
Ha iwi i liang u Kharkongor da pyntip u wa ka Shella Constituency kawa haap ha ka Sohra Civil Sub Division, em ko 58 tylli ki Polling Station wei kamwa 30,000 ngut kiwa thap Vote, wa kynthup ya ka Kalatek kawa haap wow lai da ki lieñ wei em ko kamwa 700 ngut kiwa thap Vote.
Discussion about this post