Ka Education Sub Committee yong ka seiñ War Jaiñtia Students Union (WJSU) dadep pynkhreh ko yeiwa emkaam waroh neibynta wow pynman Competitive Exam ya ki khynnah skur wa tip kam ka First War Jaiñtia Scholarship Examination 2024 ka wow man ha ka 14 tarik uni u bnai.
Da em hadooh kamwa 750 ngut ki khynnah skur ka War Jaiñtia wow yakhun ya kani ka Competitive Exam ha ki 14 tylli ki Centre, wei daw pait bniah wei pynlai bait pynlai ryntih da ki Exam Centre In-charge wa dadep thung da ka WJSU Education Sub Committee, katwa ki Examination Hall haap ki hapoh i pait ki Examiner wa dadep thung da ka Sub Committee yow pynlai bait yei thoh Exam ki khynnah.
Ki khynnah wow ya chimbynta ha kani ka Exam kynthup i ha ka Section-I yong ki khynnah wa da pyndep ya ka Class IV ha u snem 2023 wei kiwa daw Chong Class VI ha u 2025.
Ha ka Section-II ki khynnah skur wa da pyndep ya ka Class VI ha u snem 2023 wei kiwa daw chong Class VIII ha u 2025, ka Section-III toh ki khynnah skur wa da pyndep ya ka Class VIII ha u snem 2023 wei kiwa daw chong Class X ha u snem 2025.
Kamtæ ka seiñ WJSU da e khublei wei pyn-eh-bok pyn-eh-nasib ko ya waroh ki khynnah wow yakhun Competitive Exam, wei da e khublei kyrpang ko leh ya ki dkhot wa da kreh chitom u pynman kaam yei thrang i angnood neibynta u pynku yei puræ puthi kawa man u budloom yong i roi i paar ha ka ri waroh kawi.
Neitæ ya kiwa sikai khamtam ki Headteacher, ki Headmaster wa ki Principal yong ki skur kiwa da ya embyntalang chirup chirup.
Ka seiñ lyngba u General Secretary, u Everest R Langstang kyntu ko ya ki paaid ka thaaiñ leh wow yaksohktilang ki neibynta ki kaam wa bha ka thaaiñ waka imlang sahlang.
Ka seiñ pyntip haroh ko wa kani toh ka thong wow pynduna yei dam skur chiteiñ por ki khynnah hapoh ka thaaiñ, deiwa yooluti kani ka luti daw e mynsien ko ya ki khynnah u lai ki chakhmat hei puræ puthi hadooh wow sñiawthooh ki yei sap wa da e u Blai ha ki khang yow ye ki u kreh yei kaam katkam wa yah i juk i por.
Discussion about this post