Ka Confederation of Meghalaya Social Organisation (CoMSO) da pynkhreh ko wow yachem ya u montri ki kaam pohyung ka ri, u Amit Shah lada wan u cha Shillong ha u Naiynñiaw wow yaklam hajrong i pynkrehkaam ya ka Inner Line Permit ha Meghalaya.
U Chairman ka CoMSO, u Robertjune Kharjahrin da ong u wa ha kini ki ar snem da em sakhiat i yakhih ka jylla wow pynsñiaw ya i emkaam ya ka ILP ym du ki seiñbhalang, ki dorbar tre ri næ ki synjuk kiwa yahkhmat chnong tangwa wot ka Dorbar Chna Aiñ ka jylla wa ka KHADC leh da mynjur ki ya ka rai (Resolution) wa emkaam ya ka ILP.
Da ong u wa i dawa ya ka ILP toh i kwah yong waroh kiwa chong chnong ka jylla deiwa pynrap wa ini i dawa ka jylla da poi i cha ka chkoor u montri ki kaam pohyung ka sorkar India neibhah wa ini i dawa toh iwa em yurim liang wanang deiwa pynrap leh wa ka CoMSO da yaleh ko wow yachem ya u Amit Shah wei da phah ko ya ki dorkhat ha ki por wa da dep, tangwa ym em u yoh wow phyllu yumut hajrong kani ka phang.
U Kharjahrin da ong u leh wa ka sorkar toh u burom ko ya ini i dawa a jylla wei lada u Amit Shah wan sakhiat u ha ka tayaw wa ar u Naiynñiaw, u Amit Shah toh u yachem u wa waroh ki seiñ.
Chooh chooh da ong u wa lada u Amit Shah sñiaw u yei thrang ka jylla ym eh wow e ya ka ILP ha ka jylla Meghalaya.
Da ong u leh wa ka CoMSO ha ka sngi nyngkong ka tayaw wow wan daw thoh ko cha u Chief Secretary wa u Montri Rangbah ka jylla wow pyntip yei kwah ko wow yachem hajrong kani ka phang.
