Jowai: Ynne ka sngi heipor wa wan booddien u montri ka chnat i chait i khiah ka sorkar jylla,u AL Hek hajrong i pynkhreh wow yakhun pyrchah ya ka khlam u COVID-19 neiliang u DC ka West Jaiñtia Hills, U Dykes LNS Garod da pyntip u wa da pynkhreh ya kiwa boon ki thaw neibynta wow yakhun pyrchah ya u COVID-19 hapoh ka District.
Da pyntip u wa ki Isolation Wards hapoh ka District da em le tylli hapoh Civil Hospital, Ialong; ar tylli ha Norman Tunnel Hospital, Jowai; kawi pa kawi ha ki le tylli ki CHC, wa kawi kawi ha waroh ki 12 tylli ki PHC.
Chooh chooh da ong u wa heiyatoh wa ki Corona Care Center da chim ar tylli ki hostel yong ka Kiang Nangbah Government College, Jowai kawa ye u pdiang hadooh 80 ngut ki bru wei i pynkhreh dang lai i chaaid chaaid wei yooluti wow pyndep noh ya i kreh ha ki ha kini ki sngi wow wan.
Heiyatoh won wa ki Quarantine Center won katni da em ka skur JNV, Mukhla kawa em 6 tylli ki Block kiwa ar mala, heiwa ha kawi ka mala em 22 tylli ki pyllong, wei ha waroh em ki kamwa 280 tylli ki pyllong.
Chooh chooh da ong u wa heiyatoh wa ki Relief Camp da em kawi ha IB ka PWD, Saphai; ka St. Dominic HSS, Mowkyndeng; ha DIET, Mukhla; kawi won ha Amlarem wei hadooh katni waroh kiwa khih mylla toh kiwa sah ha ki thaw kreh yong ki wei da pynbiang da kiwa e kreh (Employer) ya ki wei lada em iwon iwon iwa emkaam wow wan cha ki bor ka District ki wow leh yeiwa emkaam. Ha IB ka PWD, Saphai won da em ar ngut kiwa sah ha kani ka thaw.
Discussion about this post