Deiwa kyntait ya iwa dawa ka National Socialist Council of Nagaland (Isak-Muivah), ka sorkar India da rai ko wow lai chakhmat wow ya soi soskular yasuk namo ka Peace Accord wa kani ka seiñ kieñ suloi kamjooh kiwi ki seiñ ka Nagaland.
Hanla da em leh ki dkhot ka NSCN (IM) kiwa yahkhmat da u Secretary General u Th. Muivah ym pu em mynjur ki wow soi yaka kani ka Peace Accord, ka sorkar India da ban joor ko wa kattu da chong haka NSCN(IM) wow chim ya i rai yong iwa da em haka “Final Draft Agreement” kawa da thmu wow wanrah yei suk ha Nagaland hadien ki phaw snem i yakhih.
Katkam wa ong ka Ministry of Home Affairs wa da booh thong wow ya soi noh ya kani ka Peace Accord wei yaka Draft wa khaddooh da dep pynkhreh.
Ki bru yong u Prime Minister deilang wa u Lat ka Nagaland u R.N. Ravi da em ki ha New Delhi yow pynbait khaddooh yei yaklam hapyrdi ka NSCN(IM) kiwa yahkhmat da u General Secretary u Th Muivah waka Intelligence Bureau (IB) kiwa da dep wow yaklam 10 sngi nachwa.
Chooh chooh da ong wa i kam wa ha kini ki 10 sngi wa ym em yachem ka NSCN(IM) wa ki bru ka IB, toh wa em kiwa yahkhmat ka NSCN (IM) wa thmu wow pynsñiawthooh bakla wa i yaklam dang lai i chakhmat. Da pyntip leh wa i dawa wow yoh yaka lama waka Constitution wa yaphær na ka India ha Nagaland da chah kyntait biang wei ka NSCN(IM) da pyrchang ko wow pynslem ya ini i yaklam wei ka sorkar India da klam che ko wa ym bien de ko wow pynjrong chooh ya ini i kaam.
Chooh chooh da ong wa ini u man ko ka sien wa nyngkong wa hadooh ki seiñ paidbah namo ki Civil Society Group leh u yasoi ki ya kani ka Peace Accord deilang wa ki seiñ kieñ suloi.
Ka NNPG kawa kynthup ya 7 tylli ki seiñ kieñ suloi ka Naga, 14 tylli ki Naga Tribal Hohos waki Nagaland Gaon Burah (GB) Federation daw ya soi lang ki ya kani ka Peace Accord.
Ka sorkar pyrdi da ong ko wa ki kattu katni kiwa yahkhmat ka NSCN(IM) ye ki wow chah ieh samen lada pteiñ bait ki wow pyrchah yeiwa kwah ki Civil Society Group kiwa da kwah wow pynbait noh ya kani ka kaam ha Nagaland.
Nalor i wow yarap yaki dkhot ki seiñ kieñ suloi hadien wa wan pyndem ki yaki tiar yasiat, kani ka Final Draft Agreement da tyrwa ko leh wow booh ar tylli ki Autonomous Council, kawi ha Manipur wa Arunachal Pradesh- i pynman Election biang hapoh ka jylla wei u pynku yei boon ki MP haka Lok Sabha wa Rajya Sabha.
Ha u 1975, ka sorkar pyrdi da soi ki yaka Shillong Agreement wa ka Naga National Council (NNC) kawa da seiñ ha u 1946. Hadien ar snem i chong suk, da mih ka kynhun wa leh pyrchah wa yahkhmat da u Th. Muivah, Isak Chisi Swu wa u Shangnyu Shangwang Khaplang kiwa da kyntait ya kani ka soskular wei da wiar chooh ki chapoh Myanmar. Da seiñ ki yaka NSCN ha u January 1980, wei hadien 8 snem ha u April 1988 da phiah ko cha ka NSCN(IM) waka NSCN (K) neidaw wa ym ya mynjur ki yei klam yasuk waka sorkar India.
