Jowai: Ki para wa ngait ka Balang Katholik Moopakhar Sutnga, Sutnga Parish, East Jaiñtia Hills District, kiwa da lehkmen waroh chisnem ya i dap chispah snem i wan ka Balang Katholik ha chnong yong ki, haka 19 tarik uni u bnai da pynman ya ka Procession Eucharist ha chnong yong ki heiwa da ki hajar ki paaid wa ngait da ya tooid ki cha kani ka lehkmen pynkut ya i lehkmen Centenary wa ka Procession Eucharist.
Kam ka dak sñiawngooh ya u Blai uwa da pynlai bait lai ryntih ya kani ka lehkmen Centenary waroh chisnem lynter, ha i por 10 waje i step da pynman yaka knia Mass wa khooid kawa yahkhmat da u Phadar Hilarius Lamare, Vicar General ka Jowai Diocese hei ya synran lang ki Lyngdohsohblei kiwa wan na ki Parish waphær waphær yong ka Diocese.
U Phadar Hilarius Lamare, hawa klam ha kani ka sngi da pynsñiaw u yei kmen kawa khroo hawa da yoh kani ka laad wow lehkmen wa ki para wa ngait ka Balang chnong Moopakhar Sutnga wei kamjooh ya ki paaid wa ngait yong ka Sutnga Parish hi waroh kawi ha kani ka sngi pynkut yong ki ya ka lehkmen Centenary. Ha i sneiñ i kroo yong oo ya ki para wa ngait, da ong wa ki chispah snem ym toh kiwa ke wei ha kini ki chispah snem kiwa da dep khlem pep da maad ya chiboon i eh, la kattæ leh da ong u wa u Blai ym em mylliñ wei da emlang u wa kiwa para wa ngait, da kyrkhu kyrdoh u wa ki para wa ngait wa da roi ki. Neitæ ong u ki chispah snem kiwa da lai noh wei kiyi won kawa ki para wa ngait yong ka Balang chnong Moopakhar Sutnga u leh ki ha kani ka spah snem kawa ar ya kiwa ngait ha chnong yong ki.
Yow pynkut ya kani ka sngi lehkmen Centenary, ha i janmiet da pynman yaka lai Procession Eucharist ha kawa u Most Rev. Victor Lyngdoh DD, Bishop ka Jowai Diocese da man u kam u kongsan wow rah emburom ya ka Sacrament wa khooid tam ka Duwan wow e ka kyrkhu wa kyrpang ya ki para wa ngait wa ya kiwa chong chnong yong ka Sutnga da ka Sacrament wa khooid tam ka Duwan wow nangroi nangku ha i im wa bha, ha i khih i khan wa ha i ya krehlang hapyrdi kiwa chong chnong khlem da kheiñ ya ka yaphær niam yow tei ya ka bha ka miat ka imlang ka sahlang wa ka jaitbru u lai ko chaphrang ha ki por wa ki sngi ki wow wan. U Bishop Victor Lyngdoh da pynkut u ya i klam deiwa kyntu wow ya krehlang wow pynman yaka ka chnong ka thaw, ka District, ka State wa ka ri hi waroh kawi kawa chong suk chong saiñ. Da pynkut ya kani ka sngi da i pynhiar wa i khylliap noh ya ka Lama lehkmen Centenary da u Most Rev. Victor Lyngdoh.
Discussion about this post