Da pynkreh ka sorkar ya ka aiñ BPTA yow khang yei pynchah pyrtuid ya ki thaw

Jowai : Kam chibynta wow yaleh pyrchah chooh chooh yei murieh ki paidbah ya ka poisa, hadooh i man tre ya ki thaw ki bhaw, ka sorkar bei u pynkrehkaam noh ko ya ka Benami Property Transaction Act, 1988 (BPTA) deiwa pynthymme ya kiwa boon ki kyndon kani ka aiñ wei da krekaam ko nadooh ka 1 tarik u Khonchonglad wa ka Benami Transactions (Prohibition) Amendment Act, 2016 nadooh ka jooh ka sngi.

Ya kiwa chah pynchitom ha kini ka aiñ daw chah kset ki hadooh 7 snem.

Ha ka juk wa katni ka sorkar da suk ko u yoh ya ki Report na ki bank, mutual fund, wa kiwa ki thaw wa pyllai ya ka poisa ym du hapoh ka ri kamjooh leh na baar ri iwa pynkhlan ya ka sorkar wow chemdien yei lai ka poisa yong ki bru wa thmu wow murieh ki na ka sorkar.

Heiliang i man tre ya i thaw i bhaw (Benami property) iwa em ha i pyrtuid yong u tre da tip ya oo kam u Benamidar tangwa dei yongsakhiat da em won sa uwi u bru wa thied wa su ya ini i thaw heijooh i por oo leh yoh myntoi u na ini i thaw, ya kam ini i thaw da tip kam ka Benami Property.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Lada u Benamidar toh uwa chi yung chi sem ym khein wa i thaw toh ki Benami Property lada ye u pynsakhiat heiwon rukom yoh ya ini i thaw. Lada i thaw toh iwa hiar pateiñ iwa em ha i pyrtuid yong ki payu para phi leh emkaam u man kam uwi na ki tre ha ki kot ki sla.

Neiliang ka Income Tax department won da pynkrehkaam ya ka Benami Transactions (Prohibition) Amendment Act, 2016 (BTP Amendment Act), hapoh kani ka aiñ won da khanglaad ya ki wa pynchah pyrtuid da kiwi ki bru wow kamtre ki ya ki thaw ki bhaw wa thied ki hei pyrtuid yong ki. Lada chem ya kam kini ki jait thaw, ye ka sorkar leh u chim ya kini ki jait thaw ha kiwon kiwon ki bynta yong ka ri khlem haap su ka sorkar iyi iyi leh.

Kani ka aiñ leh ebor ko yow chna ya ki Appellate Tribunal kiwa man kam ki yung bichaar ki wow pait ya ki kaam Benami wa kynthup ya u Joint/Additional Commissioner ka tnat Income Tax, u Assistant/ deputy Commissioner of Income Tax wa u Tax Recovery Official.

Ya ki bru leh wa pyllai ya ka poisa yong kiwi tawan ki bru hei pytruitd yong ki leh ye u pynchitom hapoh kani ka aiñ.