Da pynkrehkaam ar tylli ki Transformer wa mar 25MVA uwi ha Khliehriat Substation

U CMD ka MeECL da pyntip u wa ha kani ka tayaw wa da dep, ha Khliehriat Grid Substation kawa man kawi na kawa da rim dooh ka Grid Substation ka jylla Meghalaya, da dep wow pyndait ya ar tylli ki Transformer wa thymme kiwa 25MVA uwi iwa da pynku yei bor cha ka 50MVA.

Ini daw yarap ko ya ka Khliehriat Grid Substation wow pynpoi bordiñ deiwa khlem thut ha waroh kawi ka Ri-loom Jaiñtia. Da pyntip u leh wa da em ka thong wow booh ya ki laad yada ya ki kor kamjooh wow pynthymme ya ka Sub-station ha Khliehriat deiwa kylliang thymme ya ki tiar ki tar katkam ka juk wa katni.

Deiwa pynkrehkaam ya kini ki Transformers ha Khliehriat Grid Sub-station, da yooluti wa daw ye u pyntikna yei rukom pynpoi bordiñ cha East wa West Jaiñtia Hills kamjooh yei rukom saam bordiñ ha waroh kawi ka Ri-loom Jaiñtia.

Da em 16 tylli ki 33/11 KV S/S kiwa daw haap hapoh ka Khliehriat Grid Substation kawa daw pait ya waroh i bor kit lada hap wow pynchna ya u 132 KV Mustem Sub-station. Ka Khliehriat Grid Sub-Station kattu da man ko sa kawi laad pynpoi bordiñ ha waroh kawi ka Ri-loom Jaiñtia lada jia wa sih u 132Kv ka Mustem Grid Substation.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Boon bha ki 132 KV Feeder kiwa psiah wa mih na ka Khliehriat Grid Substation. Da em 4 tylli ki Feeder wa psiah kitæ u 132KV NEHU, 132 Mustem wa artylli ki Circuit na Myntdu Leshka Hydro Electric Project. Sa artylli kitæ toh u 132 KV Feeder wa lai cha NEEPCO Kopili Hydro Electric Project wa sa uwi wa lai cha Badarpur Substation ka Lower Assam. Kamjooh ka Khliehriat Grid Substation leh pait ko yei poi i bordin na ki Extra High Tension yow kit ya i bordiñ ka MePGCL wa NEEPCO kamjooh wow pynbiang yei poi bordiñ wa tikna ha Ri-loom Jaiñtia.

U CMD da ong u leh wa ya ka Ri-loom Jaiñtia da tip kam ka thaw wa em boon ki karkhana iwa yarap yei ye ka jylla wow pynmih poisa wei emkaam ko chiboon i bordiñ iwa da ye wow leh deiwa pynkhlanbor ya kani ka Grid Substation kamjooh yow pynpoi bordiñ leh cha kiwi ki thaaiñ mihsngi waroh kawi.

Chooh chooh da ong u wa deiwa pynkrehkaam ya kini ki 2 tylli ki Transformer thymme, daw ye wow pyndap ya iwa duna bordiñ hapoh ka Ri-loom Jaiñtia waroh kawi.