U District Magistrate ka West Jaiñtia Hills District da pynmih hukum u ynne ka 21 tarik yow pynkrehkaam da ka TOTAL CURFEW ha waroh kawi ka District nadooh 6:00 waje i janmiet ka 21-05-21 hadooh 5:00 waje i step ka 01-06-21.
Ya kani ka hukum da pynmih neidaw wa kiwa yoh COVID-19 hapoh ka District da em ki 14% na kiwa chah Test kawa tip leh kam ka Positivity Rate iwa da kheiñ nadooh ka 01 tarik hadooh ka 17 tarik uni u Naisan.
Kamtæ heipor wa em ka TOTAL CURFEW ym chah wow lai na kawi ka District cha kawi lait na kitu ki kari wa lai luti cha Assam/Tripura/Manipur/Mizoram wei ym chah wow sangeh ki ha kiwon kiwon ki thaw wa em ki chnong wa em bru ha tymbud u NH-06 wa haap hapoh u pood u ang ka West Jaiñtia Hills.
Da khang leh yei lai na kawi ka District cha kawi kamjooh u lai pyn hapoh ka District. Ym chah ya kiwon kiwon wow mih cha lait lada ym toh iwa emkaam. Ki kari wa mih khlem ki Pass daw chah pynchitom ki wei kiwon kiwon kiwa leh pyrchah daw ye ki u chah kem.
Ki kaam wa chah u leh man ki kamni ha wah:
Ki kaam wa yatoh wa i chait i khiah, wa kynthup ya i lai e tika deiwa pynyoo ya ka COWIN Registration wa i ksoh yei bhah chim tika (Slot Booking). Ki kaam wa yatoh wa ki dawai dachin, i lai i wan ki mar wa emkaam, i lai phah sumaar wa jhan, ki bru wa lai ya ki kaam sorkar, kamjooh kiwa lai ya ki kaam wa yatoh wa u COVID-19, ki pulit, ki chipai, ki Home Guards, ki Fire & Emergency Services, ki kaam bordiñ, ki kaam pynpoi um, ki kaam Municipal, ki kaam wa yatoh wa i saam rachon, Information and Public Relations, Telecommunication Services, ki kaam rep, ki kaam wa yatoh wa ki mrad wa ri wa psan deilang wa ki baam yong ki, ki bru wa lai neibynta u chna ya ka Oxygen Plant ha MCH Jowai kiwa em ya ka Identity Card, ki laad pathai khubor, NARI/1917iTEAMS, ki Petrol Pump, i li booh tadong LPG, ki dukan rachon kiwa hap u pyntikna wa deiñ ya ki Mask, u yajngai uwi ya uwi 2 meter kamjooh wow lehkhooid ya ki kti.
Ki yung krehkaam ka sorkar jylla wa ka sorkar pyrdi u wai ki katkam ka hukum wa da dep pynmih. Ki Bank wa ki Post Office u krehkaam ki deiwa em ki wakreh du 30% donhi.
Ki dukan wa dai marbaam, mardih wa kiwi kiwa emkaam man-ka-sngi kiwa em ha ki dong, daw pynbait yei rukom wai ki da ki waheh chnong wei da pynchlur wow leh da ka Home Delivery da kiwa dai ha ki jar jiar ki dong deiwa pait u Incident Commander.
Lada em i yap bru, u chah wow em 10 ngut donhi ki bru deiwa pyntip cha u DC ka District lane ha u SDO ka Amlarem.
Ym em khang ya ki kaam wa yatoh wa ka MGNREGA, ki kaam rep, ki kaam psan mrad kamjooh i kit i bah ya i baam yong ki.
Da pyndooh yei bor wa da ka e cha ki heh District wow e Car Pass ki. Waroh ki Pass wa da e neibynta ki kaam wa da khang man ki kiwa da pyndam nadooh 6:00 waje i miet ka 21-05-21.
Ya ki kaam wa jhan wa yatoh wa i chait i khiah wa i lai cha kiwi ki District yow kit ya ki mar wa emkaam, ye wow yaleh da ka ‘EPASS’ ha ka website www.westjaintiahills.gov.in.
Waroh ki kaam wa da chah toh kiwa hap wow bood katkam ki kyndon khamtam wow leh ya ka Social Distancing wa kiwi ki kyndon wa da pynmih na ki por cha ki por da ka chnat i chait i khiah ka sorkar Meghalaya.
