Jowai: U District Magistrate ka West Jaiñtia Hills da pynkrehkaam u da ka 144 CrPC ha ki soodong ka Nartiang Durga Temple kat wym pu ye u jied ya u Pandit wow lehniam heiwa da wanrah ya i yachoh yadat hapyrdi ki arliang ha ka 21, 23 wa 29 tarik u Naikhynde (Sep) 2018 wei kamjooh ynnin ka 15 tarik.
Da ong wa ini i ya awri hapyrdi ki arliang da pynthut ko yei chongsuk chongsaiñ ka chnong iwa ye u poi cha ki mynsoo mynsnaam hadooh wow dooh yei mynsien bru.
Da ong leh wa kani ka mandir man ko kawi na kiwa kyntang ha ka ngait niam Hindu wei emkaam wow burom yeini wei wow pynneh ya i man kyntang ko.
Neidaw wa i awri awra ye i u sdang ha iwon iwon i por khamtam ha kini ki por wa sdang ka lehniam Puja yow lait leh i awri awra u poor cha kiwi ki bynta ka district kamjooh wow yada ya ka mandir wa ya u pandit da pynkrehkaam da ka 144 Cr.PC.
Kamtæ ym chah wow khanglaad ya u pandit wow pyndep u ya ka niam ha lait kamjooh hapoh ka mandir, ym chah wow yalang palat 5 ngut cha rood kamjooh hapoh u pood u ang ka mandir, kani ka hukum ym krehkaam ko ya u Pandit kamjooh leh ya kiwa wan wow embynta ha ka lehniam, ym chah leh u rah ya ki tiar pynmynsoo 200 meter na i thaw wa em ka mandir tangwa ya ki pulit, ki chipai wa kiwi kiwi kiwa da phah da ka sorkar ye hi ki u rah ya ki tiar ki tar yong ki.
Kani ka hukum u krehkaam ko hadooh wa pynbna da iwi tawon.
Discussion about this post