Khliehriat: U District Magistrate, East Jaiñtia Hills District da pyntip u wa neidaw wa da boon wa dooh yei mynsien yong ki deiwa ngam um ha ki wah ka District heipor wa lai kjat, lai khwe dakha, heipor wa pynman ya ki tamasa wa kiwi kiwi, kamtæ da pynmih hukum wa emkaam wow sap ya ki Life Jacket manda chong ha kiwon kiwon ki jait lieñ.
Ki bor District deiwa ap leh yeiwa sñiaw, kamjooh ki ujor ki paidbah wa ki seiñ wa boon da pynkrehkaam yaka Section 144 CrPC yow khang ya waroh ki Tourism Societies, ki bor chnong, ki chnat sorkar wow pynman ya ki Boat Tour neibynta kiwa uiñke suwari, ki wakreh sorkar kiwa lai yei kaam yong ki lait noh du deiwa em ya ki Life Jacket ya uwi pa uwi chwa wow chong lieñ ki.
Kani ka hukum man ko leh neibynta ki tre lieñ nadooh ki bru samen, ki seiñ, ki chnat sorkar wa pynemkaam ya ki lieñ toh u booh ki chiboon ki Life Jacket wei ki bru wa yah/kiñ lieñ toh kiwa da biang wow leh ya ki kaam yong ki.
Kani ka hukum da ong ko leh wa waroh ki krem tih mooyong kiwa da ieh, wa ki thaw wa da lang um neidaw i tih mar pohkhyndaw toh u kær kut ya ki da ki tre thaw wei kiwa ksoh kaam hapoh ka chnong wow pyntip ki ya ini cha ki tre, kamjooh ya ini toh u leh leh da ki Elaka yow pyntip cha ki tre thaw wow leh ya ini i jooh. Kani ka hukum khang ko leh yimpa cha ki thaw wa khlan ka um, ki nan wa lang um, wei kiwa pynlai ya ki chnong toh u chimkhia ki wow pynbna ya ini.
Kani ka hukum u krehkaam ko chisyndon hadooh wa pynmih da iwi tawon.
Discussion about this post