Neidaw wa ku kiwa dang yoh COVID-19 ha kiwa boon ki jylla ka ri wei da ye u mih leh kiwi ki jait thymme uni u khñiang heiwa da emkaam leh wow pynkrehkaam ya ki kyndon wow yada nei poor uni u khñiang hapoh ka jylla Meghalaya wei yow booh leh ki laad yada yow pyntikna wa da bood yaka Social Distancing yow lait ka khlam COVID-19 wow poor hapoh ka West Jaiñtia Hills District wa ha Meghalaya, deiwa leh ya ka Contact Tracing, ki Test, Quarantine wa kiwi kiwi katkam ki kyndon wa pynmih daka sorkar Meghalaya lyngba ka Health & Family Welfare Department.
Kamtæ u District Magistrate, West Jaintia Hills District, Jowai da pynmih hukum u ynne ka 12 tarik hapoh Section 144 Cr. P.C. deilang waka Regulation 3 ka Meghalaya Epidemic Diseases, COVID-19 Regulations 2020 deiwa pynkrehkaam yaka hukum ‘Prohibitory Order’ hapoh waroh kawi ka District nadooh i pyrdi synyaw myntu ka 12 tarik hadooh wa pynbna da kamwi iwa mut wa ym em booh por kut.
Kani ka hukum da khang ko ya kiwon kiwon ki yalang paidbah kiwa heh (Social, Political, Entertainment, Academic, Cultural, Religious wa kiwi kiwi). Kiwon kiwon ki yalang hawa pynman ya ki hap wow pyntikna wa bood ya ka Social Distancing deiwa yajngai ym duna ya 6 phut, u deiñ ya ki Face Mask, ym toh wow mynthu wei wow tymmoh yei ktien hawa ka’oh wei synrieh ha waroh ki por.
Ka hukum da khang ko leh yei lai i wan ha ki thaw paidbah, ki thaw kreh, ki dukan, hawa lai lut khlem deiñ Mask wei ya kiwa leh pyrchah daw chah daiñ kuna ki T.1000. Da khang leh wow mynthu wei wow dih kiad, baam kwai, duma wa kiwi ha ki thaw paidbah.
Ka hukum da ong ko leh wa waroh ki bru hap ki wow yajngai ym duna ya 6 phut lane 2 meter haki thaw paidbah.
Waroh ki dukan, Restaurant ki Bar hapoh ka District wow khang ki hapoh 9 waje i miet.
Waroh kiwa chong chnong ka District toh u pynmyllien ki ya i rukom im iwa yada na u COVID-19.
I em ki bru ha ki yalang da pynduna cha 50%.
Waroh ki Hotel hap ki wow paan yaka COVID Negative Certificate neibynta ki Tourist wa wan na baar ka jylla.
I chong ki bru hapoh kari toh du katkam wa da chah donhi hapoh ki kari kamai.
