U Montri Rangbah ka Meghalaya, u Conrad K. Sangma deiwa emlang u MLA ka Tikrikilla, u Jimmy D. Sangma ynnin ka sngi da booh mooyurim ki yow pynku kyrdan ya ka Tikrikilla PHC cha ka Community Health Centre ha Kentapara wa em hapoh Dadenggre Block, West Garo Hills.
Da emlang leh u MLA ka Phulbari, u SG Esmatur Mominin wa u Co-Chairman ka State Planning Board, u Limison D. Sangma deilang wa kiwi de.
Neiliang u Conrad da ong u wa kani ka CHC daw e ko yei chait i khiah neibynta ki paidbah kani ka thaaiñ wei da chim ya kani ka rai wow pynku kyrdan cha ka PHC hadien wa da yoo u yei duna kani ka thaw sumaar.
“Ki Doctor ki Nurse yong i da kreh chitom ki wow e yei chakri wa bha tam khamtam ki thaw wa em cha palatsor wa kiwa em cha kdong cha chmiang wei ka sorkar wa katni toh kawa kreh chitom wow wanrah yei sumaar sukhær wa bha wa miat ha waroh kawi ka jylla,” da ong u Conrad.
Da khana u leh wa ka sorkar da mang ko kamwa T. 350 klur yow pynmiat pynbna ya ki thaw sumaar wa em hapoh ka jylla hadien wa chem yeiwa jia heipor ka khlam COVID-19 kamtæ ka sorkar da chim ko ki laad ki luti yow pynbiang yeiwa emkaam ki PHC wa CHC neibynta ka mynried.
“Kat cha wa lai da yoo bait yei kaam pynroi wa em ki du ha cha sor kamtæ i da pynkylla i yei rukom krehkaam yow yoh ki paidbah wa cha palatsor wa ki thaw wa jngai yei bynta yong ki,” da ong chooh chooh u.
Da e khublei u leh ya ki paidbah ka Kentapara kiwa da e yei thaw yow chna ya kani ka CHC deiwa ong wa em ki por u yoh yei thaw toh iwa eh ya ka sorkar hanla hawa wanrah ya ki kaam pynroi.
Ka chnong da e ko kamwa 62 Acre i thaw yow chna ya kani ka CHC ha chnong Kentapara.
