U Montri Rangbah ka jylla, u Conrad Sangma da pyntip u wa ynne hapoh ka yalang ki Montri sorkar namo ka Cabinet da chim yei rai wow mynjur yeiwa daw klam u Lat namo ka Governor’s Address hapoh ka dorbar mang tangka kawa daw sdang ha ka tayaw wa daw wan.
Da chim leh yei rai neibynta ka Capt. Williamson Sangma Technical University Amendment Bill yow pynkylla noh ka yow man noh ko kam kawa nyngkong dooh ka State University ka Meghalaya ka wow tip kam ka Capt. Williamson Sangma State University wei ya kani ka Bill leh daw wanrah hapoh kani ka dorbar.
Deiwa yoh ya ka State University hapoh ka jylla, ki College ka jylla ye ki wow lai paan yei yoh tipmit na kani ka University wei daw lait ki khynnah wow yaleh ya ka CUET.
Kawi won ka rai wa da chim toh yow pynku ya ka Grant-in-aid yong ki 710 tylli ki Pre-Primary School. Wei yeini da pynku na ka T. 12,000 cha T. 18,000 ya waroh kini kiwa sikai Pre-Primary School wei daw lut T. 5.11 klur chi snem neibynta ini.
