Khliehriat: Chirup wa waroh kawi ka pyrthai da pynemwarom ya ka Universal Children’s Day namo ka sngi kyrpang yong ki khynnah ha C.H.C Khliehriat, East Jaiñtia Hills District ha kani ka 20 tarik uni u bnai.
Ya kani ka lehwarom da pynman da ka Health Department, Khliehriat hei krehlang wa ka Basin Development Unit, Khliehriat heiwa ka R.S. Manner, ADC, Khliehriat da man ko kam ka kongsan.
Ka Dr. H.L. Suting Manager DEIC, EJH hei klam yong ka da pyntip ko wa ka Health Department da pynkrehkaam noh ko ya ka RBSK Scheme yong ka Ministry of Health and Family Welfare, Govt of India hapoh ka jylla lyngba ka National Health Mission.
Da ong ko wa kiwa kreh yong ka RBSK, Mobile Health Team (MHT) daw lai ki cha waroh ki chnong wow sylli (screening) ya ki khynnah ha jar jiar ki Anganwadi Centre. Da pyntip ko leh wa daw em soo tylli ki MHT hapoh ki ar tylli ki C&RD Block, 8 ngut ki doctor, 4 ngut ki Pharmacist wa 4 ngut ki Nurse hapoh kani ka RBSK MHT. Da kyntu ko leh yaki paidbah wow chim kabu ki ya kini ki scheme.
Ki sumaar wa yoh lyngba ka RBSK toh kiwa yoh mynkna ki paidbah khamtam kiwa jæd ktien, kaad poh ktien, dor kjat, kjut klong snaam wa kiwa kjut khmat. Kamtæ ha kani ka sngi da pynkup burom ya waroh kiwa da yoh myntoi lyngba kani ka Scheme.
Da em 13 ngut kiwa da yoh sumaar kjut klong snam, 2 ngut kiwa dor kjat, 29 ngut kiwa jæd ktien/kaad poh ktien, 12 ngut kiwa long i pyllung khmat wa 6 ngut ki chaleng khmat.
Ha kani ka sngi da pynman leh ya Screening Camp heiwa ka Manipal Hospital, Bangalore, ka Mission Smile, MMCH Guwahati, ka Cure International India & Congenital Cataract waka Bansara Eye Care Center da sylli ki ya 220 ngut kiwa em ki chitom waphær wapær.
Discussion about this post