Jowai: Ka yung krehkaam Senior Dairy Officer, West Jaiñtia Hills ynne ka sngi da lehkmen ki yaka National Milk ha pchem ka Jowai Dairy Plant wa em ha Mooralong, Jowa. Heiwa u MLA ka Jowai u Wailadmiki Shylla da emlang u kam u kongsan waka RS Manners, Additional Deputy Commissioner kam ka symbood kongsan.
Hawa klam yei emkaam wa i myntoi wa yoh nei dud, u Wailadmiki Shylla da ong u wa i dud yarap ko yei chait khiah ki paidbah. Da pynchlur u ya kiwa ri masi wow ri rap boon chooh yow pynmih boon chooh chooh i dud wa bha yow ye u pyndap yei emkaam ka District kamjooh ka jylla. Da pynchlur u leh ya ki bru samen wow kreh ya iwon iwon i kaam wow yoh ki neibhah deiwa kreh dohyap deiwa em i sñiawhun yei kreh daw ku ki ha iwon iwon i kaam wa leh ki.
U B. Dkhar, Dairy Officer hei klam yong oo da ong u ya kani ka sngi da lehkmen yow pynsñiawthooh paidbah yei emkaam wow dih dud iwa yarap wow tei yei doh i pran.
Yow pynsñiawthooh ya i myntoi wa yoh na i dud da pynman yaki yakob Quiz Competition, Essay wa Drawing Competition wei ya kiwa jop da e yaki da ka poisa, ki Mementos wa Certificate.
Da e khusnaam leh cha ki ar ngut kiwa ri masi kiwa da lai katkam i por kiwa pynbiang dud leh yaka Jowai Dairy Plant, u Robinus Saioo na Mulieh, West Jaintia Hills uwa da e hadooh 200 liter i dud chi sngi wa u Bress Dkhar na Rymbai, East Jaiñtia Hills uwa pynpoi 100 liter heiwa na ini 80 litre toh na ki masi wa khleh lang wa kiwi ki jait masi katwa 20 litre won na ki masi kiwa em cha i hi.
Ka RS Manners, ADC, ka Dr. D. Nongpluh, Medical Superintendent of Dr. Norman Tunnel Hospital, Jowai, u G N Kharlukhi, District Development Manger, NABARD leh da klam ki ha kani ka sngi.
Kiwi de kiwa emlang toh ki District AH&Vety Officer ka West wa East Jaiñtia Hills, u MDC ka thaaiñ u B. Chyrmang, u O Lamin, MDC ki warep wa ki khynnah skur.
Discussion about this post