Ka yung krehkaam u District Planning Officer, West Jaiñtia Hills deiwa ya krehlang wa ka State Council of Science Technology & Environment, Shillong da pynman ki yei yakob thoh Essay waka Drawing & Painting neibynta ki khynnah skur ynne ka sngi ha Training Hall ka yung krehkaam u Deputy Commissioner, Jowai kam chibynta ka Wildlife week, 2022.
Ka Wildlife Week toh kawa da sdang nadooh ka 1 tarik wei da pynkut ynne ka 7 tarik hajrong ka phang “Recovering Key Species for Ecosystem Restoration.”
Ka phang ka thoh Essay toh “Wildlife Conservation” katwa ya ka yakob Drawing and Painting ka phang toh Wildlife.
Da em 8 tylli ki skur wa da chimbynta wa kynthup ya ka Q.C. Springside Higher Secondary School, Little Angels’ Secondary School, North Liberty Higher Secondary School, Jowai Public School, Tome Memorial Secondary School, Tpep-Pale Secondary School, Government Girls Higher Secondary School waka Jaiñtia Higher Secondary School.
Ka Additional Deputy Commissioner wa District Planning Officer, ka D D Syngai, MCS da saam ko ya ki Certificate cha kiwa jop ha kini ki yakob.
Ha ka yakob Drawing & Painting da jop u Daminot Symblai na Jaiñtia Higher Secondary School wei da yoh wa ar won ka Isakaru Rynjah na Jowai Public School.
Ha ka yakob thoh Essay won, ka Gratify Tyngkan kawa na Government Girls Higher Secondary School da yoh nyngkong ko katwa u Damebudki Garod na Jowai Public School da yoh wa ar u katwa ka Vincy Nora Pyrngap na ka Little Angels Secondary School da yoh ko hei wa le.
