Jowai: Ka World Environment Week da pynkut ya ka ynne ha Jowai deiwa pynman yei yalai paidbah ki khynnah skur ka Jowai nadooh na Thomas Jones Synod College hadooh ha District Library, Mynthong Jowai.
Ha ka yalang wa pynman hapoh auditorium ka District Library ki khynnah skur ka North Liberty HSS da e ki ya i rwai hei yatoh wa ka phang yong kani ka World Environment Week wa ong “Go Wild for Life.”
U symbood kongsan u A.K. Srivastava, IFS, APCCF (Social Forestry an Environment) pynkynmoo u ya ki dak ki chin wa ka rymaw da pynyoo ko nadooh ki rong ki um ki wah, kamjooh leh ya i chlai um cha ri-loom Garo kiwa ym jooh jia hapoh ka jylla. Ong u wa boon kini jia ki du nei leh hi u bru yow pynku ya ka spah wei wow pynhun ye kwah r’hah yong oo.
Ong chooh chooh u wa nachwa, yow pynyoo yei ku ki ri ki jylla jooh kheiñ ya ki hadooh katwon i yoh kot ki bru ya ka poisa tangwa katni won da kheiñ won wa hadooh katwon man kiwa chong chnong wa kmen wa kamjooh katwon duna i pynsih ki ya ka rymaw khamtam kiwa pynmih ya ka la’ær Carbon. Da e nongmuna u ya ka ri Bhutan kawa man wa duna dooh ha pyrthai wa pynmih ya ka la’ær carbon hanlada ym em boon ko ya ki khloo ki kjam kam cha i, da ye ki u leh du nei rukom im ki iwa pyrkhat yei chait i khiah ka bei rymaw.
U kongsan ha kani ka sngi u Dr. R.C. Laloo ong u wa lada pait yei lehbeiñ u bru ya ka bei rymaw man sakhiat i kiwa embhah wa dang yoh u im ha kani ka pyrthai, ong u leh wa ka juk yong oo leh haap kit khlieh ki yeini wa man ka rymaw katni neibhah heipor khynnah u sñiawsuk ki u lai cha ki khloo yow pam ka ya ki dieñ khian ki tnat dieñ du neidaw wa yoosuk wa haap wa kheiñ ki dieñ deiwa ym tip hadooh katwon daw ktah ko ya ka mynstep ka mankawi.
Kamtæ emkaam u kitkhlieh i ya ki dieñ wa da thung khamtam ha kani ka World Environment Week neibhah ong u wa oo da boon ki dieñ wa thung u kyllieñ kyllieñ tangwa ymtip u yi jia ya ki. Kamtæ lada maya sakhiat i ya ka rymaw haap hi i u pynyoo da ki kaam.
Ha kani ka sngi leh da yoh leh ya i rwai na u Wansalan Dhar iwa booh ha ki paidbah u kylli wa dang ye mo u wanrah biang ya ka rymaw kam heipor warim?
Da em leh ar tylli ki lehke na ka Thomas Jones Synod College ka wa pynkynmoo ya ki paidbah yei kordor i chait i khiah bar ya ka poisa, wa sa kawi na ka School of Drama, Assam kiwa pynkynmoo yei kongsan u pynemkaam ya ki painkhana wei ym hoi u lai kat cha wa yoh yow lait na ki kjut wa boon jait.
Da saam leh ya ki khusnaam cha kiwa jop ha ka yakop Debate, thoh essay wa kiwi kiwi.
Da pynkut ya ka yalang deiwa puræ ya ki kyntien kular wow yada ya ka rymaw.
Discussion about this post