Ka dhab ki Montri yong ka sorkar MDA-II, da mynjur ko wow tipmit noh ya ka Lady Hydari Park kam ka Phan Nonglait Park, wei yeini da pyntip da u Montri Rangbah ka jylla, u Conrad K Sangma hadien wa da wai ka yalang ki Montri ynne ka sngi.
Kam wow kdaw heini wa i dawa wow pynkylla pyrtuid ya ka Lady Hydari Park cha ka Phan Nonglait Park da joor bha na ki seiñbhalang heiwa ka KSU da dawa ko yeini nadooh u snem 2000 wei da lai hi ki pyn da ki wow pynkylla yei pyrtuid ha u snem 2018 deiwa tympra ya ka Signboard ka Lady Hydari Park deiwa wah ya ka Signboard Phan Nonglait Park & Animal Land.
Ha kini ki sngi wa dep won da tympleh ya ki Signboard wa kdaw luti kiwa thoh Lady Hydari Park.
U Conrad da ong u wa ini i rai wow e pyrtuid thymme ya ka Lady Hydari Park toh kawa da dep chim rai rap slem, tangwa iwa pynslem won toh wow pyndep yei kaam neidaw wa em ki khynjnit khynjnat, tangwa ynne ka sngi da pynskem yei rai.
