Ynne ka sngi ha ka yalang pynkup burom ya u Montri Rangbah ka jylla, u Conrad Sangma wa da pynman da kiwa khih mooyong ka East Jaiñtia Hills District ha Khliehriat West, da ong u wa 9 snem nachwa heipor wa khang ka NGT yei tih mooyong ha ka jylla, da ktah ko ya ki paidbah ka jylla khamtam kiwa na East Jaiñtia Hills.
Da ong u wa em kiwa khayi mooyong wa ki umkhmat wa lang wym ye ki u pynlai puræ ya ki khon kamjooh kiwa duna hei yoh i la wym ye de ki u psa khon.
U Conrad da pynkynmoo u wa ha ki por wa dadep da ong wa lada ye u chna sorkar daw thooh waroh ki laad wow sdang biang i tih mooyong ha ka jylla heiwa ha u 2018 ka Cabinet da chim ya ka rai wow yakhun ha ka Supreme Court kamtæ da ye u sdang biang ya u tih mooyong.
Da ong u wa u snem 2014 u Montri Rangbah warim, u Dr. Mukul Sangma heitu i por ym ye u wow leh iwon iwon tangwa manda chna sorkar ka NPP da yakhun ko ya ini i kaam.
Chooh chooh da ong u wa ha u Naiynñiaw 2019 da mih ka hukum ka Supreme Court wa ymtoh du i thaw tangwa iwa em hapoh khyndaw leh toh i yong ki tre thaw heiwa da ye u kaap chiliang wow ye u pyndam yei tih mooyong heiwa ka Supreme Court da ong ko wa ym ye wow tih kamwa leh nachwa tangwa wow pynbiang wow yada ya ka rymaw, i chngaaiñ kiwa kreh wa kiwi kiwi.
Heijooh i por da thooh laad kammon wow ye u yoh ya ka Mining Lease ha jylla wei ha ki le snem da yaklam wa ka sorkar pyrdi wei da ye wow pynkylla ya ki kyndon wow yoh Mining Lease iwa krehkaam du neibynta ka Meghalaya.
Da e khublei u ya ki chnat waphær waphær kiwa khih mooyong wei ynne da ye wow sdang u tih mooyong katkam ka juk stat wa katni.
Chooh chooh da kyrpaad u ya ki soo ngut wa kiwa da yoh Mining Lease wow yarap ya kiwi wow ye ki u yoh ya kani ka Mining Lease deiwa kreh wa ka chnat Mining.
Da beiñ u ya kiwa beiñ wa ong wa yoh u tih mooyong du kiwa mahajon tangwa da ong u wa toh waroh ye ki wow paan ya ka Mining Lease.
Heijooh i por da ong u wa kani ka sorkar ka NPP da yarap ko ya waroh nadooh ki warep, kiwa seiñ khih wa kiwi kiwi.
U Conrad da ong u leh wa manda ye u tih mooyong daw ye u chalan ya u mooyong cha ki karkhana deiwa pynrap wa kyrmen u wa 500 MW ka bordiñ daw ye u pynmih lyngba u mooyong ha ki san snem wow wan wei da boon ki karkhana wa da yaklam wow kreh ya ini i kaam pynmih bordiñ.
Heijooh i por da ong u wa nei tih mooyong daw em chiboon ki wow yoh kreh heiwa daw ku i yoh i la ki paidbah.
Ngait skem u wa ha ki 2-3 snem da chynna u wow ku i yoh i la ka jylla nadooh i put i tem, ki kaam uiñke suwari, kiwa seiñ kreh wa kiwi kiwi.
