Jowai: U Deputy Commissioner (Excise), West Jaiñtia Hills haka hukum wa pynmih ynne ka sngi, da chah wow wai ki dukan dai kiad (Wine Shop) wa ki Bonded Warehouse ha West Jaiñtia Hills District 6 sngi haka chi tayaw nadooh ka 6 tarik uni u bnai itæ nadooh ka Monday hadooh ka Saturday nadooh 10 waje i step hadooh 8 waje i miet.
U Deputy Commissioner da phah u leh ya waroh ki Wine Shop wa ki Bonded Warehouse wow bood ki thij yaki kyndon wa da booh ka Health & Family Welfare Department ka sorkar Meghalaya heiyatoh wa u COVID-19.
Chooh chooh ki Wine Shop wa kiwa wan thied kiad wow bood ki thij yaka Social Distancing deiwa yajngai 6 phut uwi na uwi wei ym toh u ya khynnia ha iwi i dukan. Da chah du 5 ngut ki bru ha i jooh i por hapoh dukan yow lait na i ya khynnia, ki wakreh ka Wine Shop toh u phah ki yaki bru wow lai cha kiwi ki dukan dai kiad lada kynnia i dukan nei boon bru.
Ki Wine Shop toh u krehkaam ki deiwa pynemkaam da iwa duna dooh ki bru wakreh wei toh u deiñ ki yaki Mask ha waroh i por. Hap leh wow e yaki bru wow pynemkaam ki yaki Hand Sanitizer hadien wa chim ki yaki klong wa hadien wa su poisa.
Waroh ki Wine Shop toh u ya krehlang ki waki bor District, Excise, Police wa kiwi ki bor sorkar.
Puræ leh: 5 sngi chi tayaw u wai ki dukan dai kiad ha West Jaiñtia Hills
