U DC ka East Jaiñtia Hills ha ka hukum wa da pynmih ha ka 24 tarik uni u bnai da ong u wa da chem yei hiar bha kiwa yoh ya u COVID-19 hapoh ka District ha kini ki tayaw wa da dep, kamtæ yow pynyllooid wei wow pynlait ya kiwa chong chnong na ki kyndon ka Containment Measure da pynbna ya ki kyndon wa thymme ki wow krehkaam nadooh ka 30-08-21 kiwa man kamni ha wah:
Da chah u wai ki dukan wa em ha ki dong ki chnong wa ki yaw wa heh kiwa em ha Khliehriat East wa West, waroh ka Ladrymbai, Umpleng, Chiehruphi, Lumshnong, Sohkymphor, Sookilo, Saipung, Semasi, Jalaphet, Rymbai, Wapung, Sutnga, Bataw, Nongjri wa Umkiang East Jaiñtia Hills.
Waroh ki dukan u wai ki nadooh 9:00 waje i step hadooh 6:00 waje i janmiet ha ka sngi Monday hadooh Friday wei toh u khang ki ha ka sngi Saturday wa Sunday.
Ki Cyber Café, ki dukan dai kot wa ki dukan Stationeries u wai ki 5 sngi chi tayaw nadooh Monday hadooh Friday.
Da chah leh wow wai ki yung (Commercial Centre) wa em ki dukan, ki Mall wa kiwi kiwa dai ya ki mar wym toh ki marbaam.
Ki thaw dai tim, i siat tim toh kiwa da chah u leh nadooh ka Monday hadooh ka Friday.
Ki dukan cha, ki Restaurant, ki dukan dai baam dihcha da chah wow wai ki deiwa chong ki bru 50% deiwa bood ya ki kyndon SOP.
Ya ki Home Delivery u chah deiwa yoh bor na u DC kamjooh ki kaam wa yatoh wa ka E-Commerce.
I khayi wa kiwi ki ri toh iwa daw pynbait da u DC.
Ki kari kamai ye u chah deiwa chah hadooh 50% da u DC kamjooh leh ki kari yong ki bru samen leh ye u chah hadooh 50%.
Heiyatoh wa ki yalehke (Sports), toh kiwa da chah deiwa bood ya ki kyndon wa pynmih da ka chnat Sports & Youth Affairs kiwa da pynmih ha ka 07-12-20. Ki jait yalehke kiwa da chah toh ki Archery, Shooting, Cycling, Athletics, Running, Golf, Lawn Tennis, Badminton, Table Tennis, Snooker, Weightlifting, Billiards, Football, Hockey, Volleyball, Basketball, Handball, Cricket wei lada em kiwon ki yakob wa pynman ym chah wow wan paitke ki paidbah.
Heiyatoh wa ki thaw yimpa kiwa em wa pait yei psiah i mih ki paidbah kam ha ki Resort, Club Pools wa ki Public Pool; toh u yabhah yei por wei deiwa booh por chwa wow wan ki bru.
Ki Gymnasium/Yoga Institute/Fitness Centre u chah u wai ki du neibynta ki bru wa da dep yoh tika deiwa yohbor chwa na u DC.
Ym pu chah wow pynman ya kiwon kiwon ki yalang paidbah, ym chah yei psiah kiwa uiñke suwari kiwa na baar ka jylla, waroh ki thaw uiñke suwari toh u man ki kiwa khang.
Hawa em i pynkyntang bia ha ki thaw mane toh deiwa bood kyndon. Ym chah wow pynman ya i khawai bia.
Lada em i yap bru u chah wow em du 20 ngut deiwa pyntip chwa cha u DC wei ym chah wow pynman yei lai paidbah hawa lai tlep/thang.
Ki Park da chah wow wai ki neibynta kiwa da dep yoh tika deiwa yoh bor na u DC.
Ki kaam chna yung wa kiwi kam kini ki jait da chah deiwa pait yei long i man i thaw. Chah hi wow wanrah ya ki bru wakreh (Skilled Manpower) deiwa yoh bor na u DC iwa chong leh hei long i man i thaw.
Kiwi de ki kaam wa chah toh kiwa yatoh wa i chait i khiah, i lai e tika, kiwa kreh ha ki kaam wym hoi u dam yong ka sorkar nadooh ki pulit, ki kaam bordiñ, Municipal, umkor wa kiwi kiwi. Ki laad pathai khubor, Petrol Pump, kiwa kit tadong LPG, ki kaam rep wa kynthup ya u kwai wa u pathai, ki kreh MGNREGA ha ki thaaiñ nongkyndong wa ki kaam psan mrad wa i pynbiang baam ya ki.
