Nongstoin: Ka yung krehkaam u Deputy Commissioner ka West Khasi Hills District da kynmoo warom ko ya ka sngi ‘Civil Service Day’ ha kani ka 21 tarik wa da dep.
Kani ka sngi man ko kam ka sngi wow pynkynmoo ya ki sahep sorkar ya ka kular yong ki wow chakri hok ya ki paidbah wei wow pynthymme ya kani ka kular.
Ya ka yalang wa pynman ha Nongstoin, ha Tyrsem Hall, DC Campus heiwa u kongsan ha kani ka sngi toh u Tokiwaio Blah, IAS (Rtd) wei da wan chimbynta lang da waroh ki sahep ka district, ki khynnah skur wa ki college ka District hanlada joor u slap.
U kongsan da yaroh u yeini i leh kmen ya kani ka Civil Service Day wei da pynkynmoo u ya ki sahep wa kani ka sngi toh u man ko kam ka sngi wow pyrkhat ha i samen samen yow ye u wanrah i kylla hei rukom chakri ya ki paidbah yow wanrah leh i thymme yei rukom krehkaam wa ki paidbah.
Da ong chooh chooh u wa i yaichah, i suk wow yoh yachem wei i man solansar toh iwa emkaam dooh ki jinglong yong ki sahep. Kamtæ da kyntu u ya ki wow pyrchang ki u sniawthooh ya ki paidbah wei wow myllin noh ya waroh wa da dep chah sikai yow ye u chakri deiwa biang ya ki paidbah.
Ha kani ka sngi leh da yoh ya ki PowerPoint Presentation hei yatoh ki kaam wa da jop hapoh ka District wa da pynyoo dur wa ki parom na kiwa mih khmat ka yung krehkaam BDO Mairang, Executive Engineer PHE, EE Water Resources, Divisional Officer Soil and Water conservation wa na ka Office u Superintendent of Fisheries.
Hadein ini da em ka yaphyllu yumut hajrong ka phang “Civil Service in Meghalaya; it’s response to emerging challenges “. Kiwa yachim bynta toh u Bobby Majaw, Associate Professor, Sankardev College, u Phyrnai Marbaniang, Retired Deputy Director DIPR, u M.B. Tongper, EAC Nongstoin wa u Father Alphonse Wahlang Vice president, NSSS.
Na kini khynnah school wan da wan chimbynta 10 ngut na kawi ka school wa ki College.
Discussion about this post