Jowai: Katwon man iwa pyndap dei kmen wei sñiaw sarong yaka Parish Amlarem wa da yoh ko sa uwi u lyngdoh nei yasyllok ka Missionaries of St. Francis de Sales (MSFS) heiwa da pynkyntang ya u Marcellinus Riawed War ynne kani ka 22 tarik da u Most Rev. Victor Lyngdoh, u Bishop ka Jylla niam Jowai diocese ha yungmane Maria Syiem Jongsuk, Amlarem, hei wan sakhi lang ki paaid wa ngait naki balang Catholic waphær waphær, hei emlang ki phadar naki parish waphær waphær.
Uni u Lyngdoh Sohblei uwa da ekti yei rta yong oo wow chakri yei kaam yong u Blai toh uwa naka chnong Nongtalang West Jaiñtia Hills District, wei oo da man u kam u phadar wa 7 na Khasi -Jaiñtia lyngba i yasyllok ki MSFS.
Katkam ka parom tbian oo toh u khon ka Unifirlda War wa u Riang Pohlong kiwa da lai chakhmat u Blai, wei oo toh u khon wa 3 na ki 4 ngut chipayu. Da kha ya oo ha u snem 1987 ha chnong Kharkhana West Jaiñtia Hills District, wei ka yung ka yong oo man ki kiwa na ka balang Presbyterian, wei hadien wa da kha ya oo waroh chi yung da pynyasoh noh ki waka balang Catholic ha Kharkhana ha u snem 1987, kamtæ ha u snem 1990 da kyrriah chnong noh ki cha Nongtalang.
Ha u snem 1995 ka bei yong oo da khlaad ko wei du hadien kattu katni por u pa yong oo leh khlaad noh u kamtæ da yachong yasah ki chi payu donhi. Da pyndep u yei puræ class X na Syiem Jingsuk Secondary School Amlarem, ya ka Class XII na SFS Higher Secondary School, Medziphema Nagaland, da pyndep u yaka Novitiate na MSFS Novitiate Chabua Assam ha u snem 2009, da pyndep u yaka Philosophy waka BA na Suvidya College Bengalore waka Regency ha u snem 2012- 2013 na St. Xavier Church Bashbari, Assam. Yaka Theology da pyndep u na Oriens Theological College, Shillong. Da pynkyntang (Deacon) ya oo ha ka 6 tarik, 2016 wei ya ka Deaconate Ministry da pyndep u na SFS Parish Nongalbibra South Garo Hills.
Ya u Marcellinus da pynbaam smai ya oo, kamjooh da duwai kyrkhu kyrdoh ya oo yow ye u wow imbha wow chakri yei kaam chaphrang neibynta i kaam yong u Blai, kamtæ kam ka dak wa da chimkti u kam u Lyngdoh næ Phadar wa pura da pynkup ya oo da ka sula Lyngdoh Sohblei.
U Most Rev. Victor Lyngdoh chwa wow e u i klam e mynsien cha ki paaid wangait da sneiñ da kroo u ya uni u lyngdoh thymme wow em i kyllooid wei sbun mynsien wow maya wei u bood yei sikai u Jisu uwa man uwa chare wabha wei u pynpoor u yei kaam u Krist da ki nuksa wei rukom im wa bha.
U Marcellinus Riawed War hei klam yong oo da e ngooh u ya kitu ki phadar ki sister kiwa hayung hasem ki lok ki jor wada yarap wa e mynsien ki ya oo hadooh wa poi u ha kani ka kyrdan, kamjooh ya ka Bei wa u Pa yong oo han lym em de ki chirup ha pyrthai leh ngait u wa ki leh kmen lang ki ha kani ka sngi.
Discussion about this post