Ynne ka sngi da man ka sngi wow sah kynmoo yaka Parish Mowkyndeng, West Jaiñtia Hills District neibhah wa ha kani ka kynti da yoh biang ko sa uwi u Lyngdoh Sohblei uwa man leh uwa 8 na kani ka Parish heiwa da pynkyntang leh ya oo ynne ka sngi ha Mowkyndeng Parish.
Ya uni u Lyngdoh da tip pyrtuid kam u Dn. Kitboklang Tyngkan uwa naka chnong Mookyndeng hi, u khon ka Hoidien Tyngkan wa u Pakalang Phawa.
Da pynkyntang Lyngdoh ya u Dn. Kitboklang Tyngkan da u Bishop ka Jowai Diocese, u Fr. Ferdinand Dkhar hei emlang u Provincial ka Salesian Province Shillong, u Fr. Paul Orphindro Lyngkot, ki Lyngdoh thymme wa dang dep pynkyntang ha Shillong Archdiocese wa kiwi.
Neiliang u Bishop Fr. Ferdinand Dkhar hawa e yei kyntien sneiñ da pynkynmoo haroh u ya ki bynta wa khroo u Lyngdoh Sohblei haka niam Catholic. Ong haroh u wa u Lyngdoh toh u bru yong u Blai wei u bru neibynta kiwi, heiwa deiwi i kyntien ye u ong u chakri yong u Blai u chakri neibynta ki para bru.
Neitæ yooluti u leh wa kamwa da jubab u yei khut u Blai, neini chakhmat leh u ye u wow pyndep yei kaamram kam u Lyngdoh neibynta u e chakri ya u Blai wa ya ki para bru.
Kam u pynkynmoo wa ya u Kitboklang Tyngkan da kha haka 06-04-1993 ha chnong Mowkyndeng wei toh u khon wa 5 naki 11 ngut chi payu.
Da sdang u yei puræ na St. Francis Mowkyndeng ha u snem 1997 neitæ nadooh Class-V haduh Class-VII da puræ won u ha St. Dominic Higher Secondary School Mowkyndeng. Ha u snem 2007 da chah jied u wow lai puræ ha Savio Juniorate Mawlai, Shillong kam u khynnah Aspirant wei da pyndep u yaka Class-VIII hadooh Class-X hapoh u snem 2007-2010.
Hadien Class-X da phah ya oo cha Bosco Mount Rongkhon, Tura yow pyndep ya ka Class XI-XII. Hadien ini da lai u cha Mariamnagar, Agartala neibynta ka Pre-Novitiate, hadien ka Pre-Novitiate da phah ya oo cha ka Novitiate, Sunnyside Shillong, Upper Shillong wei da chim u yei smai riewniam wa nyngkong haka 24-05-2014.
Neitæ da pyndep u yei puræ Bachelor of Philosophy na Retreat Jnanodhaya Salesian College, Yescaud Salem District, Tamil Nadu, da pteiñ won u yei pure Master Philosophy ha Divyadaan Salesian Institute of Philosophy, Nashik Maharashtra.
Ya ka Practical Training wa ar snem da pyndep u hapoh u snem 2018-2020 ha Salesian College of Higher Education Dimapur, Nagaland wei da chim u leh yei smai wa khaddooh ha 22-05-2020.
Hadien ka Practical Training da lai puræ u ya ka Bachelor of Theology ha Secret Heart Theological College Mawlai, Shillong wei da pynkyntang Deacon ya oo haka 01-07-2023 ha Secret Heart Shrine Secret Heart Theological College Mawlai, Shillong.
Discussion about this post