Ya ka yungmane (Chapel) kawa da chna neibynta ka Star Cement Christian Fellowship da ka Star Cement Pvt Ltd., da dep wow pynkyntang yaka da u Rev. C.L. Laloo uwa man kam u Moderator ka Khasi Jaintia Presbyterian Synod Mihngi ynne ka sngi.
Ha kani ka sngi da ya emlang wa u Rev. K. Laloo uwa jooh man kam u Pastor uwa jooh yakhmat ha ki snem kiwa da dep yaka Star Cement Christian Fellowship, u Rev. M.K. Lyngdoh uwa man kam u Pastor In-Charge yaka Industrial & Institutional Ministry, Lumchnong Centre ka KJP Synod Mihngi, neitæ u Rev .P.R.L. Gadew wa u Fr. Petrus Baniak.
Neiliang ka Star Cement Pvt. Ltd. da ye u ya emlang nadooh u Prem K.R. Bhajanka, Managing Director, u Pankaj Kejriwal, Executive Director, u Davinder Bansal, Residential Director, u Emlang Lamare, Local Director, u Waheh Chnong ka Lumshnong deilang wa kiwa kitkaam chnong ka Lumchnong wa kiwi de ki sahep kamjooh ki wakreh kani ka Company.
Heijooh i por da wan wow ya sakhi neiliang yong ka Balang Presbyterian Lumchnong da ki Tymmen Wasan, ki Rangbah Balang kamjooh da yoh i rwai Choir da ki khon khynroo ka Balang Presbyterian Lumchnong waka Choir na ki dkhot ka Star Cement Christian Fellowship.
Ha katai ka yaseiñ pynkyntang yungmane da yoh leh yei klam na u Rev. C.L. Laloo, Moderator ka KJP Synod Mihngi uwa da pynkynmoo naka Bible chaphang i chna yungmane ki khon Israel dei yah luti u Blai.
Da kyntu u leh ya ki dkhot ka Star Cement Christian Fellowship wow man ki kiwa tikna hei chakri hok yow Blai lyngba ka yungmane (Chapel) kawa da kyrkhu u Blai.
Discussion about this post