Shillong: Deiwa bood ya ka hukum ka Supreme Court wow pynkyllooid ya ki patok (Jail) hapoh ka ri khamtam hadien wa khai ka khlam COVID-19, ka Meghalaya State Legal Service Authority (MSLSA) ynne da booddien ko deiwa pynman ko ya ka Review Meeting lyngba ka Video Conference wa waroh ko District Jail ha ka jylla chirup wa ki Secretary ki District Legal Services Authority.
Ka thong yong kani ka yalang toh wow pynkrehkaam leh ya ka High Powered Committee, wa da sdang da ka sorkar jylla katkam ka hukum wa pynmih ka Supreme Court ha ka 23/03/2020.
U Member Secretary ka Meghalaya State Legal Services Authority, u N.A. Khan da pyntip u wa ki koidi ha ki District Jail toh katkam i bor wa ye ki u pdiang bru lait na ki District Jail ha Shillong wa Jowai. Da pyntip u leh wa da leh yeiwa emkaam katkam ki kyndon wow yada na u COVID-19 ha kini ki patok, heiwa da booh ha waroh ki District Jail ka jylla ya ki Isolation Centres neibynta kiwa dang psiah patok wot.
Ka District Legal Services Authorities da chimkhia ko leh wow pynlait ya ki koidi, khnang wow pynkyllooid ya ki patok.
U Khan da pyntip u wa hadooh katni da yoh jamin (Bail) hadooh 300 ngut ki koidi hapoh ka jylla.
Chooh chooh ka rai na kani ka yalang daw pyntip cha ka High Powered Committee, khnang wow ye ko u leh yeiwa emkaam.
