I sur rwai wa i Music Video wa pyrtuid “Ka Khon Khatdõh” wa thoh daka Lambhadaka Patlong da pynlait paidbah ynne ka sngi da u Lambokstar Marngar, President KSU Central body haka yalang wada pynman ha Conference Hall ka GHM Jowai.
Kam kawa thoh yei sur, ka Lambhadaka da pynsñiaw ko wa kammon poi sdang ko u thoh yeini i sur, kamjooh i lai luti hadooh wa ye u pyndep.
Nyngkong hi khana ko wa i sur “Ka Khon Khatdõh” wan bait ki hei thij i pyrkhat yong ka le sngi ban ban, hadooh wada hap ko u pyrkhat wa yoosar ini man i khut ya ka wow thoh ko yeini i sur rwai, kamtæ haka sngi wa soo da sdang ko u thoh.
Da ong ko wa ya ini i kaam ym jooh yimphoo næ pyrkhat ko mynnu mynnu, tangwa deiwa yarap ki paralok yong ka ha ki bynta waphær waphær da ye ko wow pyndep nadong chadong du hapoh 3 bnai.
Ka W. Sumer hawa e yei klam ong ko wa i sur rwai man ko ka laad u saam yei kyntien sneiñ haka imlang sahlang, neibhah hawa ap yei sur boonsien pynchong nia leh ya ki kyntien dei wow pynpsiah hei pyrkhat wei mynsien.
U symbood kongsan u Riquoma Rq. Laloo, Waheh Chnong ka Panaliar da ong u wa i sap man ko kam i dawai wa ye u kut por lym pynemkaam, neibhah lada pynemkaam manda dær i por, ym ye de u pynpliah u pynwandur heitæ i rukom wa angnood.
Kamtæ kyntu u wow pynemkaam hok yei sap wa da e kyrpang u Blai.
Neiliang u Lambokstar Marngar kam u kongsan ong u, boonsien hi iwon iwon i rwai em ki yei sneiñ i khroo ha lyndet. Kamtæ hawa kyruiñ u cheiwi i bynta wada pynwandur ha kani ka sur “Ka Khon Khatdõh” da wyrchaw u yei man i long ka jaitbru ha kini ki sngi.
“Hao im i haki sngi wa yabeh kaam, wei chiboon emkaam i wow ku ha kiwa boon ki liang, wei aw jan man ki yung wym dam de ki wow pynlut por hei puræ puthi, tangwa hawa pait bichaar won hei liang ka akor burom yoo kamwa nanghiar neibynta u em i bahkhlieh yaka riti dustur yong ka jaitbru wa kyrpang,” ong u Lambokstar.
Yeini da klam u toh wa yoo u yei joor i beh yei rong pyrthai, wei joor i bood yei yong kiwi, deiwa mylliñ u sñiaw sarong yei yong i da hi la hei riam i bait, i ktien u thylliej.
Neitæ yooluti u wa kiwa ap yeini i sur u man i kyrkhu ya ki wei u man i i sneiñ i kyntu ya kiwa da sdang u lai bakla, deiwa kyruiñ u sñiawthooh yei kordor ka ri ka jaitbru lyngba ki riti dustur.
Ong haroh u wa i kaam thoh wym toh iwa suk neibhah hap u ngam yillu wei klam pharchi yei im samen kamjooh yei man i long ka imlang sahlang.
Iwi nei maa wa khroo wa yang yaka imlang sahlang ong u toh wa ki khon khynroo bood ki yei yong kiwi, wei i jæd ki khynroo ha kini ki sngi toh i ngam hei dih muaid waphær waphær.
Kiwi won wa e yei klam kynthup ya u Hunmon Sutnga, u E. Shylla, Waheh Chnong Tympang Iawmusiang wa kiwi de.
Da yoh leh yei duwai Blai na u H. Pajuh haka yalang wa pynlai da u K. Ladia, Waheh Chnong Khliehiongriang.
Da pynchongchit ya kani ka sngi dei rwai wa kamjooh i wan emlang kiwa boon ki manbei manpa, ki lok ki jor wa ki khynroo khyllood.
