Jowai: Ha ka 8 tarik uni u bnai da pynlait ya ka Music Video u Wanshan Suchiang kawa pyrtuid Dashisha da u Kyrmen Shylla uwa man u montri ka sorkar jylla kam u kongsan hei emlang u Nujorki Sungoh kam u symbood kongsan, u Phasmon Dkhar uwa man kam u MDC ka JHADC.
U Phasmon Dkhar hawa e i klam da ong u wa emkaam wow man kiwa yaichah hawa kreh ya kawon kawon ka kaam khamtam ha kini ki sngi ki Artist ym yoh lap ware ki kam ha ki por nachwa heipor wa ki VCD wa ki DVD lai yaaw bha ki wei embhah wa em ka YouTube kawa man ka rynsaan ya ki bru wow pynyoo ki yei sap yong ki wei emkaam leh wow man kiwa kreh chitom.
U Nujorki da ong u wa hawa kyruiñ cha kiwa rwai ymtoh wow mylliñ ya u Blai wei ymtoh wow man kiwa sarong manda pawnaam tangwa emkaam wow pynemkaam hok ya ka sap wa em ha i.
Kam u kongsan, u Kyrmen Shylla da yaroh u ya u Wanshan Suchiang neibhah ki sur kiwa jooh rwai man ki kiwa em yumut wa kiwa e mynsien ya kiwa ap. Wei wa u Wanshan da man u i sarong ya ka Ri-loom Jaiñtia neibhah wa ya ki sur u da jooh lai tem u cha ki Concert ha Singapore wa kamjooh ha ki Radio Station ha ri America.
Da yooluti u leh wa u Wanshan daw rah burom u ya ka jylla ha kawi ka sngi lyngba ki khusnaam waphær waphær.
Da pynlait ya kani ka Music Video ha YouTube wei ya ini i sur da rwai da ka Meda Kharkongor.
Discussion about this post