Ka Dorbar Chnong Panaliar, Jowai ynnin i miet ka 12 tarik ha Yungwalieh ka chnong da pynlait paidbah ko ya ki Ticket khle nasib (Lucky Draw) yong ka Fete ka wow man ha ka 10 wa ka 11 Kmaichoŋlad (Dec) 2021 ha Madan Bol ka chnong.
Ha kani ka miet, u Eladmi Pohshna, Assistant Executive Engineer, MeCEL, West Jaiñtia Hills District, Jowai, da wan u kam u kongsan wow pynlait ya ki Ticket ha ka yalang wa pynlai da u Riquoma Rq. Laloo, Waheh Chnong.
Da sdang deiwa e ya i ngooh i dem na u Ram Sumer hadien neitæ da yoh ya ki kyntien waiphang na u Riquoma wa ki kyntien e khublei na u Careme Phawa, General Secretary ka chnong Panaliar.
Kam u waiphang, u Waheh Chnong da khana u yei lai luti ka chnong Panaliar na ki por cha ki por wow thoohlaad u pynmih poisa weiwa dayoh sakhiat yei yarap na waroh ki liang khamtam ki khon ka chnong wa ki chongkha yong ka, heiwa u Elad Pohshna toh uwi na ki chongkha uwa smat wa stiñ bha ha kiwon kiwon ki kaam kiwa ka chnong emkaam ko ya oo. Ha kani won ka Fete da ong u, wa u pynmih poisa hei wow sdang u chna ya ka Indoor Sports Complex yong ka chnong, deiwa yooluti u wa u yoh yei kyrchaan na kiwi tawon ki paralok kamwa jooh kyrchaan hi ki na ki por wa nachwa.
Kam u kongsan, u Elad Pohshna, da yaroh u ya ki khon ka chnong Panaliar, nadooh ki por kiwa sdang u wan chong wan sah ha ka, hadooh katni wa man ki ki bru kiwa yatoh yumut ha kiwa boon ki kaam. Boonsien jooh chem u, wa heiwon iwon i bynta wa em ka chnong Panaliar, ka thaw ka bhaw da man bait ko, kawa chongchit wei wa chongkun.
Da kyntu chooh chooh u ya waroh kiwa krehkaam wa hei yahkhmat wa stat yong ki, yoh ki u nang ye u pynphet ya kiwon kiwon i thmu ka chnong neibynta i bha i miat. Ong u, wa oo u emlang u chirup wa ka chnong ha kiwon kiwon ki kaam kiwa ye u leh, khamtam hei wow pynphet ya ki Ticket cha ki lok yong oo kiwa em chajngai na ka chnong Jowai, deiwa yooluti u wa ki Ticket u man ki kiwa lai bha ha khmat ka yaw ka haat.
Ha chwa wow pynkut, u Riquoma kam u Waheh Chnong da khut u ya waroh kiwa krehkaam chnong, ki khon ka chnong, ki chongkha wa ki lok ki jor wa najan najngai yoh ki u ya wan cha ka Fete yong ka chnong, khnang wa i thmu yong ka u man iwa jop weiwa phooh waphieñ.
