Ka Seiñ Kur Kongwang, Lymba, Syngkrem, Tongper da pynman ko yaka yalang bah namo ka General Meeting wa nyngkong dooh haka 31 tarik u Duyatra (Jan), 2024 ha Shnongpdeng, West Jaiñtia Hills.
Ha kani ka yalang da yoh leh wow pynlait paidbah yaka thup sahkynmoo namo ka bui wa khana yaka parom kini ki chi kur chi jait yong kini ki soo kur kiwa da tip leh kam ki “Kur Ksiar Kur Rupa”.
Lyngba ka Yiap Lyngdoh Syngkrem waka Tyngkor Kongwang kiwa man chi payu tre, da pynyaar ki yei tnoom wei da mih sa ka kur Lymba waka kur Tongper.
Kini ki kru da em ki nadooh haka Hima Raid Marngar, ka Hima u Syiem Sohra (Khat-Ar Shnong),ka Hima u Syiem Shyllong wa chadooh ka Hima u Syiem Jaiñtiapur (Ponbari) hadooh ha ki por wa katni.
Ha kani ka sngi yong ka yalang bah kini ki chi kur da yoh leh yei sneiñ i kyntu wa i booh pood ya waroh ki para kur wym toh u horkit hordang, wow thoh næ sper dak bakla de yaka kur wow man bait KONGWANG, LYMBA, SYNGKREM, TONGPER hadooh ki pateiñ pakit kiwa daw wan.
Kani ka yachem kur da man ko kawa jop heiwa ki para kur waroh dapoi chitrhem wei ka yalang da man ko kawa chongkun.
Kiwa yahkhmat kur da pynsñiaw ki yei sñiawngooh wei e khublei wa kyrpang ya waroh ki para kur kiwa da poi dei mynsien wa kmen cha kani ka yalang wei da pyn-eh-daw pyn-eh-nasib wow nang yaar i tnoom i thyndai, nang chait nang khiah waroh ki dkhot yong ka kur Kongwang, Lymba, Syngkrem, Tongper.
Ha kani ka sngi da yoh leh yei chaad i rwai na ki dkhot yong ka kur kamjooh da pynchit da ka ksiñ ka bom, ka put tang buri wa ki chaad tynre.
Da yoh leh yei rwai na uwa pawnaam ka Khasi Jaintia, u Anthony Kongwang.
Discussion about this post