Ka kot Science Glossary wa da thoh da u Emishaphrang Dkhar u khynroo na ka chnong Thangrain, West Jaiñtia Hills District da pynlait ka ha ka 17 tarik uni u bnai ha ka yalang wa da pynman ha yung hi u.
Ha kani ka yalang da pynman leh ya ka yaseiñ duwai wa tbian deiwa emlang u Waheh Chnong, u Secretary Chnong, u Pro Pastor Hame I Talang, ki kattu katni ki Tymnen Wasan yong ka Balang Presbyterian wa kiwa hikai ya u Emishaphrang kiwa jooh sikai ya oo ha Lower Primary School Thangrain.
Hadien wa da wai ka yaseiñ duwai, da wai paidbah ya kani ka kot Science Glossary da u Pro Pastor Hame I Talang uwa pait ya ka Balang Presbyterian Thangrain uwa da ong wym jooh em ka kot kawa da thoh kam kani wei man ko leh kawa eh wow thoh.
Da yoh leh i klam na u Tymmen Wasan, u G. Tyngkan uwa da yaroh yei sap i tap u Emishaphrang Dkhar wa da pynemkaam hok u ka wei da yaroh u leh ya oo wa da wanrah burom u ya ka yung ka sem, ka Balang, ka chnong wa ya ka thaaiñ hi waroh kawi.
Da yoh leh i klam na u Pyrkhat Sungoh, Waheh Chnong uwa da ong wa dap u dei kmen wa khroo wa em kam uni u khon yong ka chnong uwa da ye wow thoh kam kani ka kot Science Glossary kawa ye u pynemkaam hapoh ka jylla yong i wa ha ri India kamjooh ha ka pyrthai waroh kawi neibhah wa da thoh hei ktien English wei da man ko leh ka sien wa nyngkong wa em uwa thoh kot napoh ka chnong Thangrain uwa da wanrah burom ya ka chnong hi waroh kawi.
Neiliang u Emishaphrang da ong u wa i thoh ya kani ka kot da chimpor hadooh 8 snem itæ nadooh u 2016 wei da pyndep ha u snem 2023. Wei da pynmiat pynbiang yei duna da ka Prof. Agreeda Lapasam. Da khana u leh wa i lai luti wow thoh ya kani ka kot toh iwa eh hadooh kattæ kattæ khamtam hawa pynchong pyntoh ya ki ktien wei iyi mut ki.
Kamtæ da e khublei u ya u Blai wa da yarap u ya oo wow pyndep u thoh ya kani ka kot dang hei rta wa 27 snem. Wei da kyntu u leh ya ki khon khynroo khyllood wa ki paradoh parasnaam yong ka Bri u Ynñiawtrep wow man kiwa kreh chitom, wow yaichah wei wow minot ha iwon iwon i kaam wa thmu ki wow pyndep khnang wow ye u poi cha ka thong yow ye u yaleh wa kiwi ki jaitbru.
Da e khublei u leh ya ka Prof. Agreeda Lapasam yei kreh chitom ko u pynbait biang yeiwa duna ha kani ka kot wei da e khublei u leh ya kiwa jooh hikai ya oo kammon wow sdang u thoh ya u ‘A’ u ‘B’ heipor wa dang man u kam u kynnah khian wei da pynkut u deiwa e khublei cha waroh kiwa jooh e mynsien ya oo nadooh wa sdang u wow thoh hadooh wa da yoh u pynmih paidbah ya kani ka kot.
Da pyntip u leh wa ya kani ka kot ye phi u thied Online lyngba ka Flipkart, Amazon, BookScape wa Notion Press.
Da yoh leh yei klam na kiwa sikai ya u Emishaphrang Dkhar heipor wa dang lai skur u ha Lower Primary School ha Thangrain, kiwa dap dei kmen wei ym poi pyrkhat wa daw mih kam uni u kynnah skur yong ki na ka skur yong ki wow man kam uwa thoh kot wa wanrah burom ya ka skur.
Discussion about this post