Kam chibynta wow pynchlur wei wow pynsñiawthooh paidbah kammon wow thoh wei wow pynemkaam ya ki dak Jaiñtia kiwa da dep leh wow mynjur da ka JHADC, neiliang u Riquoma Rq. Laloo ynne ka sngi da pynmih paidbah u ya ka kot kawa da e pyrtuid “Ka Kot Sikai Thoh wei wau Pûn Emkaam ya ki Dak A-B Jaiñtia” ha ka yalang wa pynman ha Yung Walieh ka Dorbar Chnong Panaliar heiwa u Phasmon Dkhar, MDC, EM-JHADC da wan u wow pynlait paidbah ya kani ka kot.
U Rikut Parieñ uwa man leh kam uwi na ki dkhot ka Committee wa da thung da ka JHADC yow pynmih ya ki dak ktien Jaiñtia, da ong u wa u klam donhi dei ktien khlem u tip u thoh, chisien ka sngi daw booh ko ya i hei maa, neibhah i por ym chah de ko ya i wow khana parom pateiñ da i ktien donhi.
Da ong u leh wa emkaam wow pynskem pynjanai ya iyi wa klam wa ya khana i kamwa ong i kyntien wa im i ktien im ka jaitbru, kamtæ yow im ka ktien ym toh du wow klam donhi, emkaam wow thoh leh yow man i kam u dieñ uwa em ym du ki chnat, ki sla kamjooh leh ki thied kiwa skem.
Neiliang won u Dolloi ka Elaka Jowai, u Puramon Kynjing da ong u wa sñiawsarong u wa em ki manbei manpa kam ka bei wa u pa uwa thoh kot kiwa da chdooh da e mynsien yow ye u wow pyndep ya ki thong yong oo na ki por cha ki por.
Neiliang u kongsan, u Phasmon Dkhar da khana u yei lai luti nadooh wa sdang ya ka Jaiñtia Alphabet Committee wow pynmih ya ki dak Jaiñtia deiwa ong leh wa da khut ya ki jaitbru na ri-loom Jaiñtia kam ki Sub-Tribe neidaw wym em i da ki yong i hi ki dak, kamtæ da sñiawkmen u wa kanti da yoh ki yong i ki dak wei sñiawsarong leh wa em ki bru kam u Riquoma kiwa da ye u pynmankaam ya ini kamjooh kiwi de kiwa em ha ka Committee.
U Phasmon da khana u wa hapoh ka Council leh daw pynkylla noh ya ki Form wow yaleh Pata wa ki Land Holding ha i dak Jaiñtia. Kamtæ da ong u wa kamni suki suki daw ye wow leh ya ini ha waroh deiwa pynchlur leh ya ki khon khynroo, kiwa thoh wa taar wow pynemkaam noh da ki dak Jaiñtia.
Uwa thoh ya ka kot, u Riquoma Laloo da ong u wa ki dak Jaiñtia da chim lang ya waroh kiwa em hapoh ri-loom Jaiñtia ym du ya ki Pnar. Heiwa da khana u leh wa em kiwa ong wa ini i pynmih ya ki dak thoh Jaiñtia toh i wow tympiah jaitbru tanga da pynkynmoo u wa nadooh wa sdang ya ka jylla Meghalaya da phiah ya ka ha ki le tylli ki District Council kitæ ka Khasi, Jaiñtia wa Garo wei ki Autonomous District Council em ki ka hok wow pynneh pynsah ya i yongrim ha ki thaw yong ki nadooh ka ktien ka thylliej, ka khyndaw ka chyiap waka dustur riti. Kamtæ ym toh wa tympiah jaitbru neibhah wa da dep phiah chwa nadooh wa sdang.
Heiyatoh wa ka kot, da ong u toh kawa batai kammon wow pynemkaam ya kini ki dak yow pliah wow kynnoh wei wow pynemkaam ya ki dak A-B Jaiñtia. Wei da lai u chakhmat wow thoh ya kani ka kot hadien wa da tipmit wei da pynman aiñ ya kini ki dak da ka JHADC.
Ya ka yalang ha kani ka sngi da pynlai da u Saron Pasweth, MDC, EM-JHADC wei da yoh leh yei ngoohblai na u Wanbi Laloo.
