Ka chnat Education ka sorkar Meghalaya da pyntip ko wa 20% ka poisa hapoh ka Umbrella Scholarship neibynta ki ST Student dadep pynlait ka kam ka First Instalment cha kiwa toh u yoh myntoi wei ka bhah wa dang sah daw pynlait ka ha ki 2-3 Instalment iwa chong katkam wa pynlait ka sorkar India.
Da pyntip leh wa ka sorkar India ha ki snem wa dadep da pynlait ko ya ka Post-Matric Scholarship ha ki 3–4 Instalment, heiwa kawi ka Instalment man ko neibynta ki kattu katni kiwa lai puræ wei manda jia ini da pynkuslai ko ya kitu ki wym pu em yoh yei bhah yong ki. Tangwa nadooh uni u snem, ka Education Department da leh ko deiwa thymme yow pyntikna wa waroh kiwa lai puræ u yoh ki yei bhah poisa yong ki ha kut ka Instalment wa pynlait.
Da ban joor leh wa kani ka Scholarship ym em man ko kam chibynta ka Chief Minister’s Scholarship Scheme, kawa da pynbna ha ka dorbar mang tangka ini wa dep, wei i leh Registration ya ka Chief Minister’s Scholarship Scheme daw sdang i hadien wa pynbna ya ki kyndon krehkaam kani ka Scheme.
Heiyatoh wa ka Post-Matric Scholarship for Scheduled Tribe (ST) neibynta u snem puræ 2024–25, ha ka 20 tarik uni u bnai da pynlait ya ka First Instalment kawa man 20% cha ki 66,000 ngut kiwa da em ya ka Bank Account kawa pynyabi wa u Aadhaar.
Neibynta ki 7,902 ngut kiwa dang sah ki wym pu em yoh ya ka Scholarship ki, da phah SMS ha ka 20 tarik uni u bnai lyngba ka National Scholarship Portal (NSP) ha u Mobile Number wa da Register kiwa yaleh Scholarship heiwa ha kani ka SMS da phah wow leh ya ka Aadhaar Seeding/Linking yow pynyabi wa ka Bank ki.
Hadien wa yoh ya kani ka SMS da e por 15 sngi yow leh yeiwa emkaam wei hadien ka 15 sngi kitu kiwa leh ya ka Aadhaar Linking daw yoh ki ya ka Scholarship wow pah lyngba ka NSP Payment Module.
Ka NSP System ym su ko kat wym pu kut ka 15 sngi iwa da e por deiwa kheiñ nadooh wa yoh ya ka SMS.
Ya kitu kiwa kwah wow tip bniah ye ki wow thoh cha [email protected] wei ye leh wow Phone ha kini ki Number- 7005037347/9077574956.
Discussion about this post