Jowai: Ka Draft Electoral Roll neibynta ki 4 tylli ki Assembly Constituency kitæ ka 1-Nartiang Assembly Constituency, 2- Jowai Assembly Constituency, 3-Raliang Assembly Constituency wa 4- Mowkaiaw Assembly Constituency da pynlait ynne ka sngi cha kiwa mihkhmat ki seiñ saiñ hima sima da u Additional Deputy Commissioner u P.K. Boro haka Conference Room u DC office, Jowai hei emlang ka D.D. Syngai, Extra Assistant Commissioner (Election), ki BLO wa ki wakreh ka Election Branch.
Neiliang u P.K. Boro da pyntip u wa ka Draft Electoral Roll toh yow pyntikna wa da em pyrtuid waroh kiwi emhok wow yoh Vote kiwa da em 18 snem deiwa kheiñ yaka 01-01-2021 kam ka tarik kiwa dap 18 snem, wei da pynchlur u leh ya kiwa da biang rta wow wan ki chakhmat yow thap pyrtuid ha ki jar jiar ki Polling Station heiwa daw em ki BLO ha ki. Da khut u leh yei ya krehlang waroh ki Party yow yoh yaka Electoral Roll kawa bait kawa khooid.
Ka D.D. Syngai, EAC Election da pyntip ko wa nadooh ka 15 tarik uni u bnai hadooh ka 16 tarik u Kmaichonglad (Dec), 2020 kiwa da biang rta, kiwa kwah wow pyndam pyrtuid, kiwa kwah wow ujor kamjooh wow pynbiat ya iwa bakla, ye ki wow pyndap yaki Form 6,7,8 lane 8A katkam wa emkaam.
Kam chibynta wow yoh pynsñiawthooh paidbah chaphang ka khlam, ka yung krehkaam u Deputy Commissioner Election Branch, Jowai da pynlait ki yaka Music Video.
