Ka Society for Urban & Rural Empowerment (SURE) deiwa ya krehlang waka North East Slow Food & Agro Biodiversity Society (NESFAS) da yoh ki wow pynlait yaka kari dai jhoor kawa da e pyrtuid “Farm on Wheels” ha ka chnong Mulum kawa haap hapoh ka Laskien Block, West Jaintia Hills. Kani man ko kam chibynta ka thong wa da e pyrtuid “No one shall be left behind: Initiative” kawa da kyrchaan poisa da ka Rural Electrification Cooporation, New Delhi.
Kani ka kari toh yow elaad yaki warep wow yoh ki u dai yaki jhoor cha kiwa thied deiwa pynpoi ya ki jhoor ha ki yung yong ki kawa daw yarap leh yaki warep wow yoh nong ki ha kini ki por wa em ka khlam COVID-19 kamjooh leh kawa daw yarap yaki bru yow lait ki wow lai cha ki yaw yow thied jhoor.
Ya ini i pynlait yaka kani ka kari dai jhoor da wan wai da u MDC ka thaaiñ, u R. Synkong deiwa emlang u Brightstar Langbang, BDO ka Laskein Block, u Secretary ka chnong Mulum u Dicky Suchiang, ki dkhot ka PGS Group, ki ASHA, ki Agandwadi, Youth Club wa kiwa sikai.
U BDO Laskien Block hawa e yei klam da ong u wa emkaam wow yatylli ha iwon iwon i kaam wei ki warep leh toh u pyrkhat ki yei stat Technology deiwa pyrkhat thymme ha i liang wow pynlai ya ki mar yong ki.
U R. Syngkon, MDC kam u kongsan da pyntip u wa ka chnong Mulum toh ka chnong kawa pynmih bha ya ki jhoor wa boonjait nadooh nachwa. Da ong leh wa sñiawsuk wow tip wa ha kani ka chnong da em boon kiwa da yoh yaka Certificate kam ki warep kiwa ym em pynemkaam yaki sboh dawai. Da e yumut u leh wa toh u pynbna bha ya ini i kaam khnang wa ki bru tip ki wa ha ka chnong Mulum em ki warep wa rep ya ki jhoor ‘Organic’.
