Ha ka yalang wow pynlait paidbah ya ka kot ha wa da thoh ha ka ktien Khasi kawa e pyrtuid “Ki Kjat Jingshai ka Mynnor.” U Pa Dolloi ka Elaka Jowai, u Puramon Kynjing da kyntu u ya ki paidbah wow pynmyllien ki wow puræ kot khnang wow pynproh jabieñ. Da ong chooh chooh wa i baam pynkdang i ya i doh i pran wei ki that ki sula pynmiat ki yei rynyieñ yong i, tangwa toh leh wow puræ kot yow pynkhlan yei pyrkhat pyrdaiñ.
Ya ini da ong u Dolloi hawa klam hei wai paidbah ya ka kot wa da thoh da u Dr. H.H. Mohrmen haka 21 tarik ha H.K. Singh Memorial School, Jowai. U Dolloi hawa klam kam u kongsan da ong u leh wa da dep u wow puræ ya kani ka kot wei da ye ko wow pynkylla ya oo.
U Dr. Mohrmen hawa e yei klam da khana u wa ini iwa da thoh u toh chibynta yong kiwa da klam u ha All India Radio, Shillong wei da e khublei u leh ya kiwa kreh haka Station kiwa da e mynsien ya oo wow pynmih ya kini ka kot. Ha kani ka kot em ki rukom (Tradition) kiwa da jan dooh, ki khanatang kiwa ym pu jooh khana wa kiwi de iwa thoh kiwa yatoh waka jaitbru.
Da pyntip u leh wa kani toh ka kot kawa san wa da thoh u.
U Wasalan E. Dhar uwa man u Secretary yong ka Khasi Author Society, Jowai Unit, da kyntu u ya ki paidbah wow thied ya ki kot khnang wa iwa da thoh u e mynsien i. Da ong u leh wa ki kaam thoh kot ym toh kiwa suk, kamtæ kiwa thoh kot emkaam ki i kyrchaan bor yong ki paidbah wa puræ.
Ka R.M. Khonglah kawa man kawa sikai ka Thomas Jones Synod College, Jowai hawa klam da ong ko wa hawa puræ ko ya ka kot kawa thoh da u Dr. Mohrmen da yoh myntoi bha ko.
U MM Thaiang uwa man leh u Vice President ka Khasi Author Society, Jowai Unit da ong u wa kam ka jaitbru toh u pynmih chiboon ki kot khnang wow pynheh pynkhroo ya i thiar i thoh kot yong i. Ini da ong u wa daw yarap ko u pynsuk ya ka ktien Khasi wow yoh yei tipmit u psiah ha 8th Schedule.
Hachwa yong ka yalang da yoh i duwai da u Rev. S.L aloo, Pastor ka Balang Unitarian, Jowai wa ya ki kyntien e khublei da tyrwa da ka Mattimi Passah kawa man ka khon yong u Dr. Mohrmen.
